Presidenti amerikan Donald Trump deklaroi se Shtetet e Bashkuara po shqyrtojnë mundësinë e “uljes gradualisht” të operacionit ushtarak kundër Iranit, ndërsa sulmet mes Iranit dhe Izraelit vazhdojnë.
Në një postim në rrjetet sociale, Trump tha se SHBA janë pranë arritjes së objektivave të tyre, por theksoi se vendet e tjera duhet të marrin përgjegjësinë për ruajtjen e sigurisë në Ngushticën e Hormuzit, një nga rrugët më të rëndësishme të transportit të naftës në botë.
“Po i afrohemi shumë arritjes së objektivave tona ndërsa po shqyrtojmë uljen e përpjekjeve tona të mëdha ushtarake në Lindjen e Mesme kundër regjimit terrorist të Iranit,” shkroi Trump në platformën Truth Social.
Ai shtoi se Ngushtica e Hormuzit duhet të ruhet dhe të patrullohet nga vendet që e përdorin atë për transportin e energjisë. “Shtetet e Bashkuara nuk duhet ta bëjnë këtë. Nëse na kërkohet, mund të ndihmojmë, por nuk duhet të jetë e nevojshme sapo kërcënimi iranian të eliminohet,” theksoi ai.
Deklaratat e Trump vijnë ndërsa lufta mes SHBA-së dhe Izraelit nga njëra anë dhe Iranit nga ana tjetër ka hyrë në javën e katërt. Sipas raportimeve, mbi 2 mijë persona janë vrarë në Iran që nga fillimi i sulmeve më 28 shkurt.
Ndërkohë, media iraniane raportoi se objekti bërthamor për pasurimin e uraniumit në Natanz është sulmuar. Sulmet ndaj infrastrukturës energjetike në Iran dhe në vendet e Gjirit kanë shkaktuar gjithashtu rritje të ndjeshme të çmimit të naftës, me rreth 50%, duke ngritur shqetësime për një goditje të mundshme ndaj ekonomisë globale.
Gjatë ditëve të fundit, Trump ka kritikuar edhe aleatët e NATO-s, duke i akuzuar për mungesë mbështetjeje dhe për hezitim për të ndihmuar në mbajtjen e hapur të Ngushticës së Hormuzit.
