Avion i kompanisë “Turkish Airlines” i nisur nga Stambolli për në Barcelonë, bëri ulje emergjente për shkak të një kërcënimi për bombë.
Fluturimi TK1853, një Airbus A321, kishte mbërritjen e planifikuar në aeroportin “El Prat” rreth orës 11:00 të mëngjesit të enjten (15/1). Pak para uljes, autoritetet u njoftuan për një kërcënim të mundshëm me bombë, duke çuar në aktivizimin e menjëhershëm të protokolleve të emergjencës.
Sipas një deklarate të Aena-s, “për shkak të kërcënimit u aktivizuan të gjitha procedurat e sigurisë”, ndërsa forcat e rendit po vlerësojnë situatën. Autoritetet shtuan se incidenti nuk ka ndikuar në funksionimin normal të aeroportit.
Pas uljes së sigurt, të gjithë pasagjerët u zbarkuan pa probleme, ndërsa ekipet e emergjencës dhe të sigurisë kryen kontrolle të hollësishme brenda avionit. Mediave spanjolle raportojnë se dy avionë luftarakë u ngritën për të shoqëruar fluturimin deri në ulje, si pjesë e masave standarde për incidente të tilla.
Hetimet për identifikimin e kërcënimit janë duke vazhduar, ndërsa deri më tani nuk ka njoftime për gjetjen e ndonjë objekti të dyshimtë në bord. Autoritetet njoftojnë se do të vazhdojnë monitorimin e situatës deri në përfundimin e plotë të kontrollit.
