Deputeti demokrat Edi Paloka ka sulmuar drejtpërdrejt Agron Shehaj, duke e akuzuar se po bën lojën e Edi Rama dhe se po dëmton përpjekjet për bashkimin e opozitës.
Gjatë intervistës në emisionin Kjo Javë, Paloka deklaroi se është pro bashkimit të Partisë Demokratike me të gjithë frontin opozitar, por theksoi se ky bashkim duhet të ndodhë vetëm me forca që, sipas tij, synojnë realisht largimin e Ramës nga pushteti.
Ai shprehu rezerva të forta ndaj qëndrimeve të fundit të Shehajt, duke kujtuar se PD kishte pranuar të dilte me një kandidat të vetëm në zgjedhjet lokale për Bashkinë e Tiranës, ndërsa tani, sipas Palokës, kreu i partisë “Mundësia” ka dalë me variante të reja politike.
“Ndërkohë që ti i kërkon bashkim dhe u shtrin dorën partive të opozitës, dikujt i rritet mendja, sepse është ngritur fryma se Rama nuk e ka të gjatë. Ndjehet një frymë se Rama do ikë dhe do marrë një post të rëndësishëm jashtë, dhe kjo i nxit partitë e vogla të fillojnë të mendojnë për pushtetin,” tha Paloka.
Deputeti demokrat theksoi se PD, sipas tij, ka bërë më shumë sesa i takon si forca më e madhe opozitare për të krijuar një front të përbashkët, por paralajmëroi se nuk ka kuptim të kërkohet bashkim me subjekte që, sipas tij, punojnë për të dëmtuar opozitën nga brenda.
“Unë jam përpjekur gjithmonë të bashkoj PD-në dhe opozitën — por atë opozitë që vërtet kërkon të rrëzojë Ramën. Ata që janë pjesë e lojës së tij, nuk e di pse u bëjmë thirrje ende,” u shpreh Paloka.
