Presidenti i Shteteve të Bashkuara të Amerikës ka rritur më tej presionin ndaj NATO-s lidhur me Groenlandën, përmes një letre drejtuar kryeministrit të Norvegjisë, Jonas Gahr Støre. Sipas mediave norvegjeze, presidenti amerikan ka kërkuar sërish që Groenlanda t’i kalojë SHBA-së, duke argumentuar se Danimarka nuk është në gjendje ta mbrojë territorin nga kërcënimet e Rusisë dhe Kinës.
Në letrën e tij, presidenti thekson se ka bërë më shumë për NATO-n se çdo tjetër që nga themelimi i saj dhe se tani, sipas tij, Aleanca duhet të veprojë në interes të Shteteve të Bashkuara. Ai e ka lidhur kërkesën për Groenlandën edhe me faktin se nuk i është dhënë Çmimi Nobel për Paqen, të cilin ka deklaruar vazhdimisht se e meriton.
“Duke qenë se vendi juaj vendosi të mos më japë Çmimin Nobel për Paqen, nuk ndihem më i detyruar të mendoj vetëm për paqen, edhe pse ajo do të mbetet gjithmonë mbizotëruese, por tani mund të mendoj edhe për atë që është e mirë dhe e drejtë për Shtetet e Bashkuara të Amerikës”, citohet të ketë shkruar presidenti në letër.
Nga ana e tij, kryeministri norvegjez ka deklaruar se ia ka bërë të qartë presidentit amerikan se qeveria norvegjeze nuk vendos për fituesin e Çmimit Nobel për Paqen, pasi ky vendim merret nga një komitet i pavarur.
Presidenti amerikan ka vënë gjithashtu në pikëpyetje pretendimin e Danimarkës mbi Groenlandën, duke deklaruar se ajo e konsideron territorin të sajin vetëm për shkak të një zbarkimi të hershëm historik, pa dokumente të shkruara pronësie. Ai ka theksuar se, sipas tij, siguria globale nuk mund të garantohet pa kontrollin e plotë amerikan mbi Groenlandën.
Sipas burimeve mediatike, letra është shkruar nga vetë presidenti dhe më pas është shpërndarë nga stafi i Këshillit të Sigurisë Kombëtare tek disa ambasadorë evropianë në Uashington. Autenticiteti i saj është konfirmuar nga kryeministri norvegjez, ndërsa letra është publikuar edhe nga gazetari amerikan Nick Schifrin.
