Ekspertë të Kombeve të Bashkuara kanë bërë thirrje që Izraeli të lirojë menjëherë mjekun palestinez nga Gaza, Dr. Hussam Abu Safia, duke paralajmëruar se ai është përballur me “tortura të rënda” dhe abuzime të tjera gjatë ndalimit.
Në një deklaratë të publikuar të martën, raportuesit specialë të OKB-së, Tlaleng Mofokeng dhe Ben Saul, thanë se kanë marrë informacione se gjendja shëndetësore e Abu Safia “mbetet shumë e rëndë”.
Sipas tyre, mjekut i është mohuar në mënyrë sistematike kontrolli dhe trajtimi i domosdoshëm mjekësor, duke e vënë seriozisht në rrezik jetën dhe mirëqenien e tij.
Hussam Abu Safia, ish-drejtor i spitalit Kamal Adwan në veri të Gazës, u arrestua nga forcat izraelite në dhjetor të vitit 2024, gjatë luftës në enklavën palestineze. Ai u ndalua pasi refuzoi të largohej nga spitali, i cili ishte objekti i fundit funksional shëndetësor në veri të Gazës mes sulmeve izraelite.
Ashtu si shumë të ndaluar të tjerë nga Gaza, Izraeli e ka mbajtur Abu Safia pa akuzë dhe pa gjyq, gjë që ka shkaktuar reagime të shumta ndërkombëtare.
Ekspertët e OKB-së theksuan se ai është përballur me privim arbitrar të lirisë dhe me shkelje të të drejtave të njeriut, përfshirë të drejtën për të mos u torturuar dhe për të pasur akses në shërbime shëndetësore.
Ata i bënë thirrje komunitetit ndërkombëtar dhe vendeve që kanë ndikim mbi Izraelin të ndërhyjnë për të siguruar drejtësi dhe për të parandaluar abuzime të tjera.
“Israeli duhet të lirojë Dr. Abu Safia dhe të gjithë punonjësit e shëndetësisë që mbahen në burg, duke u garantuar atyre kujdesin e nevojshëm mjekësor”, thuhet në deklaratë.
Sipas Organizatës Botërore të Shëndetësisë, që nga tetori i vitit 2023 janë regjistruar më shumë se 930 sulme ndaj sektorit shëndetësor në Gaza. Të gjitha 36 spitalet në territor janë dëmtuar nga sulmet, ndërsa vetëm rreth gjysma e tyre funksionojnë pjesërisht.
Ndërkohë, organizatat humanitare raportojnë se të paktën 1,722 punonjës shëndetësorë palestinezë janë vrarë gjatë luftës, mes tetorit 2023 dhe tetorit 2025.
