Organizata e Kombeve të Bashkuara ka lëshuar një thirrje të fortë për ndalimin e menjëhershëm të konfliktit në Gaza, duke theksuar se situata po përkeqësohet në mënyrë dramatike dhe po çon drejt një katastrofe të paprecedent.
Ramiz Alakbarov, Zëvendës Koordinator Special i OKB-së për Procesin e Paqes në Lindjen e Mesme, në një deklaratë publike shprehu shqetësimin e thellë për gjendjen e civilëve në Gaza. Ai theksoi se territori palestinez po zhytet çdo ditë e më shumë në krizë humanitare, ndërsa bilanci i viktimave rritet me shpejtësi dhe zhvendosjet masive të popullsisë po marrin përmasa dramatike.
“Sot bota shikon me tmerr teksa situata në territoret palestineze vazhdon të përkeqësohet në nivele të papara në historinë e kohëve të fundit. Po flasim për një popullsi, e cila tashmë lufton për të mbijetuar. Palestinezët në Gaza po i shohin frikërat e tyre më të këqija të bëhen realitet para syve të tyre. Operacionet e zgjeruara ushtarake në Qytetin e Gazës do të kenë pasoja katastrofike, duke përfshirë zhvendosjen e qindra mijëra njerëzve,” u shpreh Alakbarov.
Sipas tij, sulmet izraelite janë intensifikuar në të gjithë Rripin e Gazës, duke shënjestruar tendat e refugjatëve, shkollat, spitalet dhe ndërtesat e banimit. Autoritetet shëndetësore në enklavë raportojnë se që nga data 23 korrik, mbi 2.500 palestinezë kanë humbur jetën, mes tyre të paktën 270 persona të vrarë teksa tentonin të merrnin ushqim pranë pikave të shpërndarjes së ndihmave.
Alakbarov theksoi gjithashtu se nga fillimi i konfliktit më 7 tetor 2023, mbi 240 gazetarë janë vrarë në Gaza, duke e cilësuar këtë si një tjetër dimension tragjik të situatës.
“Gjatë vizitës sime të fundit në Gaza, u befasova nga shkalla e shkatërrimit dhe vuajtjeve. Takova punonjës humanitarë që rrezikonin jetën e tyre për të ofruar ndihmë, ndërsa vetë jetonin në kushte të patolerueshme,” deklaroi ai.
OKB i ka bërë thirrje komunitetit ndërkombëtar që të mos humbasë më kohë me “zvarritje” diplomatike, por të ndërmarrë menjëherë hapa konkretë për t’i dhënë fund konfliktit dhe për të parandaluar një katastrofë edhe më të madhe humanitare në Gaza.
