Vendimi i vendeve si Britania, Australia, Kanadaja dhe Portugalia për të njohur zyrtarisht shtetin e Palestinës ka shkaktuar reagime të forta nga Shtetet e Bashkuara dhe Izraeli.
Një zëdhënës i Departamentit Amerikan të Shtetit e cilësoi njohjen si një veprim “performues” dhe pa ndikim real në procesin e paqes. “Fokusi ynë mbetet tek diplomacia serioze, jo në gjeste për fasadë. Prioritetet tona janë të qarta: lirimi i pengjeve, siguria e Izraelit dhe paqja e qëndrueshme në rajon, e cila nuk është e mundur me Hamasin në fuqi,” tha zëdhënësi.
Ky zhvillim përfaqëson një ndryshim historik në qëndrimin e disa prej aleatëve më të ngushtë të Uashingtonit, pas dekadash mbështetjeje për një zgjidhje me dy shtete të arritur përmes negociatash.
Reagimi i Izraelit ishte po aq i ashpër. Kryeministri Benjamin Netanyahu deklaroi se një shtet palestinez “nuk do të ekzistojë kurrë”, duke e përshkruar këtë njohje si një “shpërblim absurd për terrorizmin” dhe një kërcënim për ekzistencën e Izraelit.
Ndërkohë, në Rripin e Gazës, palestinezët e mirëpritën njohjen si një fitore simbolike në përpjekjen e tyre për shtetësi dhe njohje ndërkombëtare. Më shumë se 140 vende anëtare të Kombeve të Bashkuara e kanë njohur tashmë shtetin palestinez, dhe pritet që edhe Franca të ndjekë të njëjtin hap gjatë diskutimeve në Asamblenë e Përgjithshme të OKB-së në Nju Jork.
