Rreth 520 milionë fëmijë në mbarë botën kanë jetuar në zona konflikti gjatë vitit 2024, që paraqet një rritje prej 47 milionë krahasuar me vitin paraprak dhe është shifra më e lartë e regjistruar që nga viti 2005, sipas një raporti të publikuar nga organizata ndërkombëtare për mbrojtjen e fëmijëve, Save the Children. Sipas raportit, kjo nënkupton se një në pesë fëmijë në botë është rritur apo ka jetuar në një zonë ku ka pasur konflikt të armatosur gjatë vitit 2024.
Raporti thekson gjithashtu se janë regjistruar 41.763 “shkelje të mëdha kundër fëmijëve” vetëm gjatë vitit të kaluar – një rritje prej 30 për qind krahasuar me vitin 2023, duke e bërë atë numrin më të lartë të shënuar ndonjëherë. Këto shkelje përfshijnë vrasje, plagosje, rekrutime të fëmijëve në forca të armatosura, sulme ndaj shkollave dhe spitaleve, si dhe pengmarrje.
Më shumë se gjysma e incidenteve janë regjistruar në katër rajone kryesore të botës: territoret e pushtuara palestineze, Republika Demokratike e Kongos, Nigeria dhe Somalia.
Në total, gjatë vitit 2024 janë identifikuar 61 konflikte të armatosura aktive në vende të ndryshme të botës – një tjetër rekord që shënon numrin më të lartë të konflikteve që nga viti 1946.
Shefi ekzekutiv i degës gjermane të Save the Children, Florian Westphal, ka bërë thirrje për veprime të menjëhershme politike për të mbrojtur fëmijët që jetojnë në zona konflikti.
“Në kohën kur po rriten përforcimet ushtarake në botë, mbrojtja e fëmijëve duhet të jetë në qendër të politikave të sigurisë. Është skandaloze që qeveritë po shpenzojnë më shumë në armë sesa në mbrojtjen e fëmijëve që jetojnë nën kërcënimin e luftës,” ka deklaruar Westphal.
Gjetjet e raportit bazohen në të dhëna të mbledhura nga Instituti për Kërkime të Paqes me qendër në Oslo (PRIO) dhe raportet e Kombeve të Bashkuara.
Sipas përkufizimit të përdorur në studim, një zonë konflikti përcaktohet si një hapësirë prej 50 kilometrash brenda së cilës ka ndodhur të paktën një “incident konflikti” gjatë vitit përkatës.
