Një ngjarje e rëndë ka ndodhur sot në Stamboll, ku një prokuror ka qëlluar me armë ish-gruan e tij, e cila po kryente detyrën e gjyqtares në një seancë gjyqësore.
Incidenti ndodhi në Gjykatën Rajonale të Apelit të Stambollit, kur gjyqtarja u godit në këmbë nga ish-bashkëshorti i saj. Ajo u dërgua menjëherë në spital dhe po merr trajtim mjekësor; raportet fillestare tregojnë se gjendja e saj është stabile. Autoritetet lokale kanë nisur një hetim mbi ngjarjen, ndërkohë që forcat e rendit rrethuan gjykatën menjëherë pas mesditës, sipas orës lokale.
Media britanike Metro.co.uk ka bërë një krahasim me një incident të ngjashëm në Shqipëri, ku gjyqtari Astrit Kalaja u qëllua për vdekje gjatë kryerjes së detyrës në sallën e gjyqit.
Kalaja po trajtonte një çështje pronësore kur një person hapi zjarr ndaj tij. Gjyqtari, i cili kishte shërbyer për tre dekada në sistemin gjyqësor, u dërgua me urgjencë në spitalin e Tiranës, ku ndërroi jetë më vonë nga plagët e marra.
