Presidenti amerikan Donald Trump ka shkarkuar nga detyra sekretaren e Sigurisë Kombëtare, Kristi Noem, pas muajsh polemikash dhe kritikash nga të dyja partitë në SHBA. Në vend të saj, Trump njoftoi emërimin e senatorit republikan Markwayne Mullin.
Noem kishte qenë përgjegjëse për zbatimin e politikës së deportimeve masive të administratës Trump. Sipas të dhënave zyrtare, gjatë vitit të parë të mandatit të presidentit u realizuan rreth 675 mijë deportime, një shifër që mbeti nën objektivin e shpallur nga Shtëpia e Bardhë prej një milion deportimesh në vit.
Mandati i saj u shoqërua me një sërë polemikash dhe kritikash publike.
Një nga krizat më të mëdha lidhej me operacionet e imigracionit në shtetin e Minesotës, ku ndërhyrjet e forcave federale shkaktuan protesta në Minneapolis.
Gjatë përplasjeve u vranë dy qytetarë amerikanë, Alex Pretti dhe Renee Good. Noem i cilësoi ata si “terroristë të brendshëm”, por pamjet e kamerave të trupit dhe të telefonave celularë ngritën dyshime mbi versionin zyrtar të departamentit të saj. Incidenti shkaktoi reagime të forta edhe nga disa republikanë, të cilët iu bashkuan demokratëve duke kërkuar dorëheqjen e saj.
Një tjetër polemikë lidhej me akuzat për shpërdorim të fondeve publike. Noem miratoi blerjen e dy avionëve luksozë Gulfstream G700 dhe ekzistonin plane për blerjen e një Boeing 737 për rreth 70 milionë dollarë. Ajo i mbrojti këto shpenzime duke argumentuar se avionët do të përdoreshin si mjete komande dhe kontrolli me rreze të gjatë veprimi dhe për operacionet e deportimit.
Kritika të shumta mori edhe një fushatë reklamuese prej rreth 220 milionë dollarësh që synonte të nxiste emigrantët të vetëdeportoheshin. Në reklamat promocionale, Noem shfaqej me kapelë kauboji duke hipur mbi kalë në një preri me bizonë. Raportimet mediatike sugjeruan se presidenti Trump ishte irrituar nga projekti, ndërsa ai vetë deklaroi se nuk kishte dijeni për reklamën.
Kontroversë shkaktoi edhe një incident i raportuar në media që përfshinte shefin e saj de facto të stafit, Corey Lewandowski. Sipas raportimeve, ai shkarkoi një pilot të Rojës Bregdetare pasi e fajësoi për humbjen e një batanijeje që i përkiste Noem gjatë një udhëtimi zyrtar. Ngjarja u komentua gjerësisht në media dhe u quajt “porta e batanijes”. Lewandowski i kundërshtoi këto pretendime.
Në mars të vitit 2025, Noem tërhoqi vëmendje edhe gjatë një vizite në burgun e sigurisë së lartë Cecot në El Salvador, ku SHBA kishte rënë dakord të dërgonte disa të dëbuar. Fotografitë e saj para qelive të mbipopulluara të të burgosurve dhe fakti që mbante një orë ari Rolex me vlerë rreth 50 mijë dollarë u kritikuan në rrjetet sociale.
Një tjetër polemikë që mori vëmendje të madhe publike lidhej me kujtimet e saj të botuara në vitin 2024. Në libër, Noem tregonte se kishte vrarë qenin e familjes, Cricket, pasi e konsideronte të rrezikshëm dhe të padisiplinuar. Historia shkaktoi reagime të forta në internet, ndërsa ajo e mbrojti vendimin duke thënë se situata të tilla janë pjesë e jetës në fermë.
Pas më shumë se një viti në krye të Departamentit të Sigurisë Kombëtare, largimi i saj shënon fundin e një mandati të karakterizuar nga polemika të shumta dhe debate politike.
