Pas dënimit të ish-presidentit francez Nicolas Sarkozy për përpjekjet për të siguruar fonde të paligjshme për fushatën zgjedhore nga Libia, vëmendja tashmë është përqendruar tek vendi ku ai do të vuajë dënimin. Edhe pse autoritetet franceze ende nuk kanë dhënë një vendim zyrtar, burime nga sistemi gjyqësor bëjnë me dije se më e mundshmja është që Sarkozy të dërgohet në burgun La Santé në Paris. Ky institucion i sigurisë së lartë është një nga më të njohurit në Francë, ku kanë qëndruar dikur figura të njohura si militanti i majtë Carlos “Shakalli” dhe ish-diktatori panamez Manuel Noriega.
Sipas Wilfried Fonck, përfaqësues i sindikatës së rojeve të burgjeve, ky burg është “më i përshtatshmi për një profil si Sarkozy”. Ai shpjegon se La Santé ka një repart të posaçëm për “personazhe të ndjeshëm”, i njohur si “reparti VIP”, ku janë mbajtur edhe politikanë të tjerë, mes tyre ish-bashkëpunëtori i ngushtë i Sarkozy-t, Claude Guéant, i dënuar gjithashtu këtë javë.
Në këtë repart, të burgosurit mbahen në qeli individuale, në vend të qelive me tre persona, dhe dalin vetëm për aktivitete në oborr për arsye sigurie. Përndryshe, kushtet janë të njëjta me pjesën tjetër të burgut, me qeli nga 9 deri në 12 metra katrorë.
Julien Fischmeister, përfaqësues i Observatorit Ndërkombëtar të Burgjeve në Francë, tha se La Santé është rinovuar së fundmi dhe ofron kushte më të mira se shumë institucione të tjera të ngjashme. Pas rinovimit, çdo qeli ka dush të brendshëm, ndërsa të burgosurit kanë mundësi të përdorin televizor me pagesë (14 euro në muaj) dhe një telefon fiks.
Ushqimi i shërbehet direkt në qeli, por ekziston edhe mundësia që të burgosurit të blejnë produkte për të gatuar vetë.
“Ne nuk ia urojmë burgun askujt, por është e rëndësishme të theksojmë se për një herë të rrallë, një figurë e një shtrese shoqërore që zakonisht i shpëton burgut, këtë herë do ta përjetojë atë,” tha Fischmeister.
Për Sarkozy-n, përvoja pritet të jetë e rëndë. Gjatë mandatit të tij ai njihej për qasjen e ashpër ndaj krimit dhe deklaratat e tij të forta, ku në një rast i cilësoi të rinjtë e dhunshëm të periferive si “plehra” dhe kërcënoi t’i largonte me mjete policore të forta. Megjithatë, ashtu si shumica e burgjeve franceze, edhe La Santé përballet me mbipopullim. Sipas të dhënave të Ministrisë së Drejtësisë, në gusht ky burg kishte 1.243 të burgosur, megjithëse kapaciteti i tij zyrtar është vetëm 657 vende.
