Mes mosmarrëveshjeve të akumuluara mes Izraelit dhe Shteteve të Bashkuara mbi mënyrën e përfundimit të luftës në Gaza, kryeministri izraelit Benjamin Netanyahu është nisur drejt Floridës për një takim të drejtpërdrejtë me presidentin amerikan Donald Trump. Takimi pritet të zhvillohet të hënën, më 29 dhjetor, në rezidencën Mar-a-Lago dhe konsiderohet vendimtar për zhvillimet e ardhshme në Lindjen e Mesme.
Sipas mediave ndërkombëtare, në qendër të bisedimeve do të jetë zbatimi i fazës së dytë të planit amerikan për përfundimin e konfliktit në Gaza. Kjo fazë mbetet e paqartë dhe e mbushur me tensione, pasi Hamasi dhe Xhihadi Islamik nuk kanë dorëzuar ende trupin e pengut të fundit izraelit, ndërsa përpjekjet për ngritjen e një force shumëkombëshe që do të mbikëqyrte çarmatimin e Hamasit kanë hasur rezistencë dhe mungesë konsensusi.
Qeveria Netanyahu ka bërë të qartë se, sipas saj, rindërtimi i Gazës nuk mund të nisë pa çarmatimin e plotë të Hamasit. Në këtë kuadër, Izraeli vazhdon të refuzojë çdo rol të Turqisë apo të Autoritetit Palestinez në fazën e dytë të planit amerikan dhe pritet t’i kërkojë Uashingtonit “dritën jeshile” që ushtria izraelite të marrë vetë përsipër operacionin e çarmatimit në Gaza.
Një tjetër pikë e ndjeshme në axhendë është çështja e Somalilandit. Diskutimet mbi një njohje të mundshme të Somalilandit nga Izraeli kanë rikthyer në vëmendje planin e diskutueshëm për zhvendosjen e një pjese të popullsisë së Gazës, ide që ka shkaktuar reagime të forta ndërkombëtare. Autoritetet e Somalilandit kanë mohuar publikisht çdo lidhje me Gazën apo me skenarë të tillë, por këto deklarata nuk kanë mjaftuar për të shuar shqetësimet e komunitetit ndërkombëtar.
Takimi Netanyahu-Trump shihet si një moment kyç për përcaktimin e drejtimit të politikës amerikane në Lindjen e Mesme, në një kohë kur lufta në Gaza, fati i Hamasit dhe balancat rajonale mbeten burim tensioni të vazhdueshëm diplomatik dhe politik.
