Kantautori i njohur britanik Chris Rea ka ndërruar jetë sot në moshën 74-vjeçare.
Në një deklaratë të përbashkët, bashkëshortja dhe dy fëmijët e artistit njoftuan se Rea “u nda nga jeta në spital, pas një sëmundjeje, i rrethuar nga familja”.
Chris Rea ishte i njohur ndërkombëtarisht për hitin e famshëm të Krishtlindjeve “Driving Home for Christmas”, si dhe për një sërë këngësh që shënuan sukses të madh në fund të viteve ’70 dhe gjatë viteve ’80, përfshirë “Fool (If You Think It’s Over)”, “Let’s Dance” dhe “The Road to Hell”.
I lindur në Middlesbrough, Rea kishte kaluar prej vitesh probleme serioze shëndetësore. Ai ishte diagnostikuar me kancer në pankreas dhe në vitin 2001 iu nënshtrua një operacioni të rëndë për heqjen e pankreasit.
Chris Rea mbetet një nga figurat më të veçanta të muzikës britanike, i vlerësuar për stilin e tij karakteristik dhe kontributin e gjatë në skenën muzikore ndërkombëtare.
