NATO ka ndërmarrë një iniciativë të re për të rritur sigurinë në krahun lindor të Evropës, pas një incidenti me dron rus që shkelu hapësirën ajrore të Polonisë këtë javë. Lajmi u konfirmua të premten nga Sekretari i Përgjithshëm i aleancës, Mark Rutte.
Operacioni, i quajtur “Eastern Sentry” (Roja Lindore), pritet të nisë në ditët në vijim dhe do të angazhojë forca dhe mjete ushtarake nga disa shtete anëtare, përfshirë Danimarkën, Francën, Gjermaninë, Mbretërinë e Bashkuar dhe të tjera, tha Rutte.
“Eastern Sentry do të forcojë qëndrueshmërinë tonë mbrojtëse dhe do të dërgojë një mesazh të qartë: si një aleancë e përkushtuar ndaj mbrojtjes, ne jemi gjithmonë të përgatitur për çdo kërcënim,” theksoi ai.
Rutte e cilësoi shkeljen me dron të mërkurën si “të rrezikshme dhe të papranueshme”, duke shtuar se nuk bëhet fjalë për një rast të izoluar. Sipas tij, sjellja e papërgjegjshme ajrore e Rusisë përgjatë kufijve lindorë të NATO-s është në rritje.
Komandanti Suprem i Forcave Aleate të NATO-s për Evropën, gjenerali amerikan Alexus Grynkewich, sqaroi se operacioni do të ketë një natyrë të “fleksibile dhe të shkathët” dhe do të përfshijë elementë të mbrojtjes së integruar ajrore dhe tokësore, si edhe shkëmbim të avancuar të inteligjencës mes vendeve aleate.
Ai shtoi se, edhe pse zbatimi i plotë i operacionit do të marrë kohë, hapat e parë do të ndërmerren menjëherë.
Sipas një komunikate për shtyp të NATO-s, ndër pajisjet që do të vendosen janë: dy avionë F-16 dhe një fregatë kundërajrore nga Danimarka, tre Rafale nga Franca dhe katër Eurofighter nga Gjermania.
Operacioni do të shtrihet përgjatë të gjithë krahut lindor të NATO-s – nga veriu i largët, deri në Detin e Zi dhe Mesdhe.
“Në të gjithë këtë hapësirë, ne do të përshtatemi dhe do ta ndryshojmë në mënyrë dinamike qëndrimin tonë, për të mbajtur kundërshtarin në pasiguri dhe për t’iu përgjigjur në mënyrë të drejtpërdrejtë çdo kërcënimi që shfaqet,” përfundoi Grynkewich.
