Shtetet e Bashkuara kanë paralajmëruar se do të pengojnë çdo përpjekje të Iranit për të bllokuar Ngushticën e Hormuzit, një nga rrugët më të rëndësishme të transportit të naftës në botë.
Sekretari amerikan i Mbrojtjes, Pete Hegseth, deklaroi në një konferencë për shtyp se ushtria amerikane po merret me situatën dhe se Irani nuk do të lejohet të pengojë qarkullimin në këtë korridor strategjik, megjithëse nuk dha detaje se si do të veprohet.
Nga ana e tij, gjenerali Dan Caine, kryetar i Shefave të Shtabit të Përbashkët, tha se ushtria amerikane po synon të godasë aftësinë e Iranit për të vendosur mina detare në ngushticë.
Përmes Ngushticës së Hormuzit kalon zakonisht rreth 20 për qind e naftës së tregtuar në botë, çka e bën çdo kërcënim ndaj saj një faktor me ndikim të madh në tregjet globale të energjisë.
Ndërkohë, çmimet e naftës kanë mbetur të larta, edhe pasi administrata e presidentit Donald Trump lehtësoi disa kufizime për dërgesat e naftës ruse në përpjekje për të shmangur një krizë energjetike të lidhur me luftën në Lindjen e Mesme.
