Platforma e mediave sociale X deklaroi të hënën se ishte "thellësisht e shqetësuar" nga vendimi i një gjykate indiane që hodhi poshtë sfidën e saj ndaj mekanizmave të heqjes së përmbajtjes të vendosur nga qeveria e Nju Delhit, dhe se do ta apelonte këtë vendim për të mbrojtur lirinë e shprehjes në vend.
X, që është në pronësi të Elon Musk, ka qenë në konflikt me autoritetet indiane prej muajsh lidhur me sistemin e ri për heqjen e përmbajtjes, duke e barazuar atë me censurën. Qeveria e Kryeministrit Narendra Modi ka argumentuar se sistemi i ri synon të luftojë përhapjen e përmbajtjeve të paligjshme dhe të sigurojë përgjegjësi në internet.
Sipas X, mekanizmi i ri "nuk ka asnjë bazë ligjore", bie ndesh me vendimet e gjykatës më të lartë të vendit dhe shkel të drejtat themelore të indianëve për lirinë e fjalës dhe të shprehjes.
Musk, i cili e përshkruan veten si një mbrojtës absolut i lirisë së shprehjes, është përplasur me autoritetet në disa vende për kërkesat për pajtueshmëri dhe heqje përmbajtjeje, por padia e kompanisë në Indi ka në shënjestër vetë bazën e rregullimit më të rreptë të internetit në vendin më të populluar të botës.
Qeveria e Modit ka intensifikuar përpjekjet për të kontrolluar internetin që nga viti 2023, duke lejuar shumë më tepër zyrtarë të lëshojnë urdhra për heqje përmbajtjeje dhe t’i dërgojnë ato direkt kompanive teknologjike përmes një faqeje interneti të nisur në tetor.
Javën e kaluar, një gjyqtar indian deklaroi se çdo platformë që operon në Indi "duhet të pranojë se liria është e lidhur me përgjegjësinë".
Në një postim, X tha: "X e respekton dhe e zbaton ligjin indian... Por nuk pajtohemi me mendimin se nuk kemi të drejtë të ngremë këto shqetësime për shkak se jemi të regjistruar jashtë vendit...". /Reuters
