Rusia ka ndërmarrë një nga sulmet më të mëdha ajrore ndaj Ukrainës, duke përdorur rreth 600 dronë dhe 40 raketa të llojeve të ndryshme gjatë natës së fundit.Në qytetin perëndimor të Lviv, pranë kufijve të NATO-s, një person humbi jetën dhe tre të tjerë mbetën të plagosur. Disa ndërtesa banimi pësuan dëme të konsiderueshme si pasojë e goditjeve.
Forcat Ajrore të Ukrainës raportuan se numri total i raketave dhe dronëve të lëshuar nga Rusia arrinte në 614, prej të cilëve 577 u neutralizuan me sukses. Ky konsiderohet si sulmi më i madh ajror ndaj Ukrainës që nga muaji korrik.
Tradicionalisht, sulmet ruse janë përqendruar në rajonet lindore, pranë vijave të frontit, por së fundmi janë zgjeruar edhe në qytetet perëndimore. Kujtojmë se më herët, në fillim të korrikut, Rusia kishte kryer sulmin më të madh të katër viteve të luftës, me 728 dronë dhe 13 raketa të hedhura ndaj qyteteve në të gjithë vendin.
Nga ana tjetër, ushtria ukrainase deklaroi se ka goditur një rafineri nafte në rajonin e Rostovit, në territorin rus, i cili kufizohet me Donbasin. Po ashtu, forcat e Kievit thanë se kanë shkatërruar një depo dronësh në Donetsk, si dhe disa objekte të tjera ushtarake dhe infrastrukturore.
Presidenti ukrainas, Volodymyr Zelensky, u shpreh se Moska nuk ka dhënë asnjë sinjal serioz për t’u angazhuar në negociata të vërteta për përfundimin e luftës. Ai përsëriti thirrjen për më shumë presion ndërkombëtar dhe sanksione të forta ndaj Rusisë.
Sulmet ndodhin në një kohë kur po intensifikohen përpjekjet diplomatike për një takim të mundshëm mes Presidentit ukrainas Zelensky dhe Presidentit rus Vladimir Putin deri në fund të muajit gusht. Megjithatë, Zelensky ka bërë të qartë se nuk e dëshiron mbajtjen e këtij takimi në Budapest, duke e konsideruar Hungarinë si një vend që nuk ka treguar mbështetje për Ukrainën gjatë luftës. Si alternativa të tjera për organizimin e samitit janë përmendur Roma dhe Gjeneva, me këtë të fundit që shihet si opsioni më i pranueshëm për shkak të neutralitetit të Zvicrës.
