Sipas disa mediave iraniane në mërgim dhe burimeve pranë opozitës monarkiste, Asambleja e Ekspertëve mund të ketë zgjedhur Mojtaba Khamenein, djalin e liderit suprem të ndjerë Ali Khamenei, si udhëheqësin e ri suprem të Iranit.
Nëse konfirmohet, ky zhvillim do të shënonte një kthesë të fortë drejt një sistemi pothuajse dinastik në krye të Republikës Islamike, duke krijuar një situatë paradoksale për një regjim që lindi nga revolucioni kundër monarkisë së Shahut. Analistja iraniane Farnaz Sabet e përshkroi këtë mundësi me ironi, duke thënë se në këtë rast si Republika Islamike ashtu edhe opozita e saj kryesore do të kishin një “shpirt monarkik”.
Mojtaba Khamenei, 57 vjeç, konsiderohet djali i preferuar dhe një nga figurat më me ndikim në prapaskenat e pushtetit iranian. Karriera e tij është zhvilluar kryesisht në strukturat e ashtuquajtura të “deep state”-it iranian, të lidhura me krahun më të ashpër të Gardës Revolucionare dhe aparatin e sigurisë.
Ai ka jetuar pothuajse gjithmonë në Iran dhe ka udhëtuar shumë pak jashtë vendit. Në moshën 17-vjeçare iu bashkua Gardës Revolucionare dhe mori pjesë në luftën Iran-Irak, fillimisht në një njësi ideologjike të krijuar nga komandanti Ahmad Motevaselian dhe më pas në një batalion që më vonë u bë pjesë e rrymës më radikale të Republikës Islamike.
Pas luftës ai studioi në seminarin shiit të Qomit, përpara se të rikthehej në Teheran ku punoi në zyrën e Udhëheqësit Suprem, strukturë që drejtohej nga i ati. Nga ky pozicion ai ndërtoi një rrjet të gjerë ndikimi brenda Gardës Revolucionare dhe në rrjetet ekonomike jashtë vendit. Një hetim i Bloomberg ka përmendur gjithashtu lidhjet e tij me investime të konsiderueshme në pasuri të paluajtshme në Londër dhe qytete të tjera perëndimore.
Në vitin 2005 ai mbështeti fuqishëm kandidaturën e Mahmoud Ahmadinejad dhe konsiderohet një nga figurat që qëndruan pas shtypjes së protestave të “Valës së Gjelbër”, lëvizja reformiste që kundërshtoi rizgjedhjen e Ahmadinejad duke denoncuar manipulime zgjedhore. Ai është përmendur gjithashtu si një nga organizatorët e linjës së ashpër ndaj protestave të vitit 2019 për rritjen e çmimeve të karburantit.
Rrethi i tij i ngushtë përfshin klerikë konservatorë si Alireza Panahian dhe Mohammad Qomi, të cilët kundërshtojnë çdo hapje sociale apo kulturore që mund të cenojë bazat ideologjike të revolucionit islamik dhe e shohin liberalizmin perëndimor si kundërshtar.
Sipas shumë vëzhguesve iranianë, nëse Mojtaba Khamenei do të zgjidhej në krye të Republikës Islamike, ai nuk pritet të jetë një lider pragmatik që do të kërkojë ndryshime, por një vazhdues i vijës së ashpër të ndjekur nga i ati – madje ndoshta edhe më radikal.
