Një operacion i gjerë kërkimi është duke u zhvilluar pas zhdukjes misterioze të një avioni të vogël mbi ngushticën Bass, mes Australisë dhe Tasmanisë, pasditen e së shtunës. Avioni i vogël, me ngjyrë jeshile të ndritshme, po udhëtonte drejt aeroportit të Hillstonit në Condobolin, në New South Wales, duke kaluar përmes Leongatha në Victoria, kur u zhduk nga radarët. Në bord ndodheshin piloti – një burrë rreth të 70-ave – dhe pasagjerja, një grua rreth të 60-ave, të dy banorë të Tasmanisë. Ata po udhëtonin për të vizituar miq. Sipas Autoritetit Australian për Sigurinë Detare (AMSA), kërkimi është përqendruar pranë Tasmanisë.
“Rreth orës 17:00 të së shtunës, u ngrit alarmi pasi avioni nuk arriti të ulej në destinacionin e planifikuar në pjesën qendrore-perëndimore të NSW-së. Fluturimi kishte nisur nga George Town, Tasmania, rreth orës 12:45,” – bëri me dije një zëdhënës i AMSA.
Avioni nuk kishte bërë asnjë kontakt me radion dhe nuk kishte lëshuar sinjal “mayday” përpara zhdukjes. Inspektori i Policisë së Tasmanisë, Nick Clark, deklaroi se piloti ishte me përvojë, megjithëse avioni ishte relativisht i ri për të.
“Avionin e kishte blerë vetëm tre ose katër muaj më parë. Besojmë se kishte kryer disa fluturime më herët,” – u shpreh ai.
Kërkimi po zhvillohet nga ajri dhe deti në ngushticën Bass dhe në pjesën jugore të shtetit Victoria, në bashkëpunim me autoritetet e Tasmanisë dhe të Viktorias. Clark shtoi se misioni mbetet një operacion kërkimi dhe shpëtimi, me shpresën se çifti do të gjendet gjallë. Trageti ditor mes Tasmanisë dhe kontinentit australian u devijua drejt vendndodhjes së fundit të njohur të avionit të shtunën, por nuk u gjet asnjë gjurmë. Autoritetet u njoftuan nga të afërmit e shqetësuar pasi avioni nuk mbërriti në destinacionin e planifikuar.
