Misioni i NATO në Irak është tërhequr përkohësisht nga vendi për shkak të përkeqësimit të situatës së sigurisë, kanë deklaruar dy zyrtarë irakianë për agjencinë AFP.
Sipas njërit prej tyre, nuk ka mosmarrëveshje me qeverinë irakiane dhe bëhet fjalë vetëm për një tërheqje të përkohshme. “Ata janë të shqetësuar për shkak të situatës”, tha zyrtari në kushte anonimiteti.
Një tjetër zyrtar shtoi se pothuajse i gjithë personeli i misionit është larguar, duke lënë vetëm një numër të vogël trupash në vend.
Ndërkohë, një zëdhënës i NATO-s konfirmoi se aleanca ushtarake po “rregullon” praninë e saj në Irak. Misioni i NATO-s ka selinë në një bazë ushtarake në zonën e gjelbër të Bagdad, pranë ambasadës së SHBA-së, e cila që nga fillimi i luftës është sulmuar disa herë.
