Shtëpia e Bardhë po përpiqet të qetësojë tregjet dhe opinionin publik ndërsa çmimi i naftës u rrit në 118 dollarë për fuçi, duke thelluar krizën globale të energjisë gati tre javë pas fillimit të luftës SHBA-Izrael kundër Iranit.
Presidenti Donald Trump tha se kriza është e përkohshme dhe se do të ndërmerren masa për ta zbutur, ndërsa çmimet e naftës janë rritur rreth 50% që nga 28 shkurti, kur nisi konflikti.
Pas sulmeve dhe kundërsulmeve ndaj infrastrukturës së naftës dhe gazit në rajon, rritet frika për dëmtime afatgjata që mund të ndikojnë në ekonominë globale dhe të rrisin çmimet e karburanteve dhe mallrave.
Administrata amerikane po shqyrton disa masa emergjente, përfshirë lirimin e naftës nga rezervat strategjike të SHBA-së dhe mundësinë e lejimit të shitjes së një sasie të naftës iraniane që aktualisht është nën sanksione.
Ndërkohë Pentagoni ka kërkuar 200 miliardë dollarë financim për luftën në Iran, ndërsa sulmet në rajon kanë goditur edhe sektorin e energjisë në Katar, duke rritur më tej pasigurinë në tregjet globale.
