Presidentët e Shteteve të Bashkuara të Amerikës, Donald Trump, dhe i Federatës Ruse, Vladimir Putin, u takuan të premten në Alaska, ku përshëndetja e tyre u shoqërua me një gjuhë trupi që tërhoqi vëmendjen e mediave ndërkombëtare.
Sipas agjencisë Reuters, të dy liderët shtrënguan duart dhe e prekën njëri-tjetrin në krah, në një shfaqje të dukshme afërsie, duke dhënë përshtypjen e një miqësie të hershme. Putini, i cili mbërriti në tokën amerikane me ftesë të Trump, pavarësisht se konsiderohet kriminel lufte në shumë vende të botës për shkak të luftës në Ukrainë, shfaqi një buzëqeshje pothuajse të plotë gjatë takimit.
Presidenti rus është i kërkuar nga Gjykata Ndërkombëtare Penale (GJNP), i akuzuar për krime lufte që lidhen me deportimin e qindra fëmijëve nga Ukraina. Rusia mohon akuzat dhe, duke mos qenë palë nënshkruese e traktatit themelues të GJNP-së, Kremlini e ka hedhur poshtë urdhër-arrestin si të pavlefshëm.
Donald Trump ka kohë që ka folur publikisht për marrëdhënien e tij miqësore me Putin. Edhe pse kohët e fundit ka paralajmëruar pasoja ndaj Moskës në rast se nuk ndalon luftimet me Kievin, deri tani këto paralajmërime nuk janë zbatuar në praktikë.
