Italia nuk do të marrë pjesë në “Bordin e Paqes” të propozuar nga presidenti i SHBA-së, Donald Trump, raportoi të mërkurën gazeta italiane Corriere della Sera. Sipas saj, autoritetet italiane vlerësojnë se bashkimi me një strukturë të tillë, të kryesuar nga udhëheqësi i një vendi të vetëm, do të binte ndesh me Kushtetutën e Italisë.
Plani i Trump ka shkaktuar reagime të kujdesshme mes aleatëve perëndimorë, pasi diplomatët paralajmërojnë se një këshill i tillë mund të minojë rolin dhe punën e Kombeve të Bashkuara në menaxhimin e konflikteve globale.
Trump pritet të kryesojë të enjten një ceremoni prezantuese të këtij këshilli të ri në Davos, Zvicër, në kuadër të World Economic Forum. Megjithatë, sipas Reuters, kryeministrja italiane Giorgia Meloni nuk ka gjasa të marrë pjesë në Davos, pavarësisht marrëdhënieve të mira që ajo ka me Trump.
Këshilli i propozuar do të drejtohej nga vetë Trump dhe, sipas planit fillestar, do të niste punën me konfliktin në Gaza, për t’u zgjeruar më pas edhe në luftëra të tjera. Vendet anëtare do të duhej të paguanin një tarifë prej 1 miliard dollarësh secila për të siguruar anëtarësim të përhershëm.
Sipas Corriere della Sera, Kushtetuta italiane lejon pjesëmarrjen e Italisë vetëm në organizata ndërkombëtare që garantojnë “paqen dhe drejtësinë mes kombeve” dhe vetëm “në kushte të barabarta me shtetet e tjera”. Ky parim, sipas gazetës, bie ndesh me strukturën e këshillit të ri, ku SHBA-ja do të kishte rol dominues.
Ftesa për t’u bashkuar i janë dërguar rreth 60 vendeve. Deri më tani, vetëm pak shtete, përfshirë Hungarinë dhe Izraelin, i kanë pranuar pa rezerva. Ndërkohë, Kremlini konfirmoi këtë javë se edhe presidenti rus Vladimir Putin është ftuar, një zhvillim që ka shtuar më tej shqetësimet mes aleatëve perëndimorë.
