Zonja e Parë e SHBA-së, Melania Trump, ka kërcënuar se do të padisë Hunter Biden me një shumë që tejkalon 1 miliard dollarë, pas pretendimeve të tij se ajo ishte prezantuar me Donald Trump nga abuzuesi seksual i dënuar Jeffrey Epstein.Në një intervistë të fundit me regjisorin Andrew Callaghan, djali i presidentit Joe Biden aludoi për lidhje të ngushta mes Donald Trump dhe Epstein, duke sugjeruar se ky i fundit kishte luajtur rol në takimin e parë të çiftit presidencial.
Avokatët e Melania Trump e kanë cilësuar deklaratën si “të rreme, shpifëse dhe përçmuese”, duke paralajmëruar se nëse Hunter Biden nuk tërheq menjëherë pretendimin dhe nuk kërkon falje publike, do të përballet me padi për dëmshpërblim financiar.
Pretendimi i Biden duket të jetë bazuar në një koment të gazetarit Michael Wolff për Daily Beast, artikull i cili u tërhoq pas një letre ligjore nga pala e Melania Trump. Sipas profilit të “Harper’s Bazaar” të vitit 2016, Melania e ka takuar Donald Trumpin në një festë të organizuar nga një agjenci modelingu në nëntor 1998, dhe nuk ka asnjë provë zyrtare që e lidh këtë me Epstein.
Ngjarja vjen në një kohë kur presioni mbi autoritetet për publikimin e dokumenteve të papublikuara të çështjes Epstein po rritet, ndërsa Trump ka premtuar se do t’i bëjë publike nëse rizgjidhet president.
