Presidenti i Venezuelës, Nicolás Maduro, është transportuar nga Metropolitan Detention Center në Brooklyn, Nju Jork, ku ka qenë i ndaluar gjatë dy ditëve të fundit nën akuza për trafik droge dhe armësh. Ai pritet të paraqitet para një gjykate në Nju Jork për procedurat fillestare gjyqësore.
Sipas pamjeve të publikuara, Maduro ka dalë nga një automjet i blinduar, pjesë e autokolonës që e shoqëronte, i veshur me uniformë paraburgimi ngjyrë kafe, dhe më pas është drejtuar drejt një helikopteri. Pranë tij, nën masa të rrepta sigurie dhe i shoqëruar nga forcat e rendit, ndodhej edhe një person që dyshohet të jetë bashkëshortja e tij.
Burime bëjnë me dije se Maduro dhe bashkëshortja e tij, Cilia Flores, pritet të dalin sot para një gjykate në Nju Jork, ndërsa autoritetet amerikane nuk kanë dhënë ende detaje të mëtejshme mbi seancën apo masat që mund të merren ndaj tyre.
