Në Kosovë ka përfunduar numërimi i të gjitha votave të zgjedhjeve të 28 dhjetorit duke e rënditur lëvizjen Vetëvendosja me mbi 51 përqind.
Komisioni Qendror i Zgjedhjeve në Kosovë njoftoi se e ka përfunduar numërimin e të gjitha votave të zgjedhjeve të parakohshme parlamentare të 28 dhjetorit, të cilat e renditin Lëvizjen Vetëvendosje të parën me 51.11 për qind të votave. Kjo parti ka shënuar rezultatin më të mirë ndonjëherë.
Fletëvotimet e fundit që u numëruan ishin ato me postë. Sipas zëdhënësit Valmir Elezi, KQZ para se të shpallë dhe certifikojë rezultatin përfundimtar, duhet pritur edhe 48 orë për ankesat e mundshme të ndonjë subjekti politik.
“Sipas Ligjit për zgjedhjet e përgjithshme, palët mund të parashtrojnë ndonjë ankesë në Panelin Zgjedhor për Ankesa dhe Parashtresa (PZAP), lidhur me administrimin e numërimit në Qendrën e Numërimit dhe Rezultateve, brenda 48 orëve nga ndodhja e shkeljes së supozuar”, thotë Elezi.
Partia Demokratike e Kosovës (PDK), tashmë ka parashtruar një ankesë e cila ka kërkuar shfuqizimin e mijëra votave të diasporës që kanë ardhur në Kosovë me postë.
Lëvizja Vetëvendosje, me rezultatin e shënuar në zgjedhje prej 51.11%, ka siguruar 57 vende në Parlament. Partia e dytë është Partia Demokratike e Kosovës (PDK), me 20.19%, apo 22 vende në Kuvendin prej 120 deputetësh.
Lidhja Demokratike e Kosovës (LDK), ka fituar 13.23%, që i sigurojnë asaj 15 vende. Aleanca për Ardhmërinë e Kosovës (AAK), ka fituar 5.50% të votave dhe kjo parti do të ketë gjashtë deputetë. Lista Srpska, partia më e madhe e serbëve në Kosovë dhe që e ka mbështetjen e Beogradit, siguron nëntë nga dhjetë vendet e garantuara për komunitetin serb.
Një deputet nga radhët e serbëve do ta ketë Partia për Liri, Drejtësi dhe Mbijetesë e Nenad Rashiqit. Ndërkaq, të dhjetë vendet e tjera të garantuara për pakicat joserbe janë shpërndarë në disa parti dhe koalicione.
Lideri i Lëvizjes Vetëvendosje, që është edhe kryeministër në detyrë, Albin Kurti, ka thënë se pas certifikimit të rezultateve të zgjedhjeve, ai synon shpejt konstituimin e Kuvendit dhe formimin e qeverisë së re, të cilën do ta udhëheqë edhe për katër vjet.
