Mijëra njerëz u mblodhën në qendër të Londrës për marshimin e organizuar nga aktivisti i ekstremit të djathtë, Tommy Robinson, ndërsa një kundërprotestë nga aktivistë kundër racizmit po zhvillohej në të njëjtën kohë.
Policia Metropolitane njoftoi se për këto demonstrata janë angazhuar rreth 1,000 oficerë, me barriera të vendosura për të krijuar një “zonë sterile” që ndan dy grupet.
“ Sot Londra qëndron krenare në mbrojtje të njërit prej të drejtave tona më të rëndësishme – lirinë e fjalës,” shkroi Robinson në rrjetin X.
Rrugët ishin mbushur me flamuj të Bashkimit, kryqe të Shën Gjergjit, kryqe skoceze dhe flamuj uellsianë, ndërsa turma e madhe e protestuesve u grumbullua pranë Urës Waterloo, përpara marshimit “Bashkojmë Mbretërinë” drejt Whitehall-it.
Policia tha se për këtë ditë kishte huazuar 500 oficerë nga forca të tjera, përfshirë njësitë policore nga Leicestershire, Nottinghamshire dhe Devon e Cornwall.
Në flamuj ishin shkruar sloganë të ndryshëm si “Ndalo Anijet”, “Dërgojini në Shtëpi” dhe “Bashkojmë Mbretërinë”. Në turmë ishin edhe aktivistë kundër komunitetit transgender.
Një burrë mbante një kryq të madh druri me mbishkrimin “RIP Charlie Kirk” – aktivisti i djathtë amerikan që u qëllua për vdekje të mërkurën gjatë një fjalimi në universitet.
Në marshim priten të mbajnë fjalime ish-strategu i Presidentit amerikan Donald Trump, Steve Bannon, dhe prezantuesja Katie Hopkins.
Një skenë ishte ngritur në Whitehall, ku disa qindra njerëz ishin mbledhur që në orët e para të pasdites. Ata mbanin flamuj dhe pankarta të ndryshme, ndërsa një grup muzikor luante këngë për lirinë dhe për Tommy Robinson, emri i vërtetë i të cilit është Stephen Yaxley-Lennon.
Në anën tjetër, rreth 500 persona u mblodhën pranë Russell Square për kundërprotestën “Marsh Kundër Fasizmit”, të organizuar nga grupi Stand Up To Racism (SUTR).
Protestuesit mbajnë pankarta me mbishkrime si “Gratë Kundër Ekstremit të Djathtë”, “Kundër Tommy Robinson” dhe “Refugjatët Mirëpriten”.
Grupi po marshon drejt Sheshit të Parlamentit, vetëm disa qindra metra larg marshimit “Bashkojmë Mbretërinë”. Pritet që fjalime të mbajnë deputetet Diane Abbott dhe Zarah Sultana.
Para nisjes së marshimit, policia Metropolitane konfirmoi se nuk do të përdorë teknologjinë e njohjes së fytyrës në kohë reale për të monitoruar demonstratën “Bashkojmë Mbretërinë”.
Policia gjithashtu shprehu shqetësime për komunitetin mysliman në Londër, për shkak të “retorikës anti-myslimane dhe incidenteve me thirrje fyese nga një pakicë në marshimet e mëparshme”.
Komandantja Clair Haynes u bëri thirrje myslimanëve të Londrës që të mos ndryshojnë planet ose të shmangin qendrën e qytetit, por nëse ndihen të shqetësuar, të kërkojnë ndihmë nga policia gjatë qëndrimit në hapësira publike.
Ajo tha: “Oficerët do të jenë të vendosur kundër çdo sjelljeje diskriminuese apo që kalon nga protesta në krim urrejtjeje.”
Gjithashtu shtoi se policia do të veprojë “pa frikë dhe pa paragjykime” dhe kërkoi nga demonstruesit të tregohen të kujdesshëm ndaj komuniteteve përreth.
Policia njoftoi se marshimi “Bashkojmë Mbretërinë” do të përfundojë në orën 18:00, ndërsa kundërprotesta në orën 16:00, sipas orareve të njoftuara nga organizatorët.
