CEO i Meta, Mark Zuckerberg, pritet të dëshmojë të mërkurën në një proces gjyqësor në Los Angeles që konsiderohet një moment historik për industrinë e rrjeteve sociale. Në sallën e gjyqit do të jenë të pranishme familje që fajësojnë platformat digjitale për dëmet psikologjike dhe rastet tragjike që lidhen me përdorimin e tyre nga të rinjtë.
Procesi është ngritur nga një e re, e identifikuar si “Kaley”, e cila pretendon se përdorimi intensiv i Instagram dhe YouTube gjatë fëmijërisë dhe adoleshencës ndikoi negativisht në shëndetin e saj mendor. Padia është e para nga mbi 1,500 procese të ngjashme që mund të hapin një precedent ligjor për përgjegjësinë e kompanive teknologjike mbi dizajnin e produkteve të tyre.
Familjet që do të ndjekin dëshminë e Zuckerberg thonë se kërkojnë përgjegjësi reale nga kompanitë që sipas tyre kanë krijuar mekanizma të varësisë digjitale te të miturit. Disa prej tyre kishin qenë gjithashtu të pranishëm në seancat dëgjimore të Kongresit amerikan në vitin 2024, ku Zuckerberg kërkoi falje publike ndaj prindërve.
Nga ana tjetër, Meta mohon akuzat dhe deklaron se ka ndërmarrë masa për sigurinë e përdoruesve të rinj, përfshirë llogaritë “teen accounts”, kufizime të përmbajtjes dhe rregulla më të forta privatësie. Sipas kompanisë, këto masa kanë ulur kontaktet e padëshiruara dhe ekspozimin ndaj përmbajtjeve sensitive për adoleshentët.
Procesi gjyqësor mund të ketë pasoja të mëdha financiare për kompanitë teknologjike, pasi një vendim kundër tyre do të hapte rrugën për miliarda dollarë dëmshpërblime dhe mund të detyronte ndryshime të rëndësishme në mënyrën se si funksionojnë platformat sociale.
Në këtë çështje janë përfshirë edhe kompani të tjera si TikTok dhe Snap Inc., të cilat kanë arritur marrëveshje jashtë gjykate në disa raste, ndërsa procese të tjera vazhdojnë.
Ky gjyq po shihet si një test i madh për industrinë e teknologjisë: a kanë bërë kompanitë mjaftueshëm për të mbrojtur përdoruesit e rinj, apo dizajni i platformave është ndërtuar për të maksimizuar qëndrimin online, pavarësisht pasojave.
