Presidenti serb, Aleksandër Vuçiç, zhvilloi një bisedë telefonike me presidentin e Venezuelës, Nikolas Maduro.
Kjo telefonatë vjen në një kohë kur administrata amerikane e presidentit Donald Trump vendosi një shpërblim të majmë për arrestimin e tij, duke e cilësuar Maduron një “kërcënim për sigurinë kombëtare”.
Kreu i Beogradit e konsideron Maduron një mik të madh të Serbisë dhe nënvizon se bisedoi me të për sfidat aktuale globale dhe rritjen e bashkëpunimit dypalësh.
Vuçiç pohon se e ka falënderuar Maduron për mosnjohjen e pavarësisë së Kosovës.
“Serbia e vlerëson shumë mbështetjen parimore dhe të vazhdueshme të Venezuelës kur bëhet fjalë për ruajtjen e integritetit tonë territorial dhe mosnjohjen e pavarësisë së shpallur njëanshëm të Kosovës”, shkruan Vuçiç në një deklaratë.
Aktualisht nuk dihet ende se çfarë efektesh do prodhojë telefonata Vuçiç-Maduro në marrëdhëniet mes Beogradit dhe Washingtonit.
