Presidenti francez Emmanuel Macron deklaroi në Forumin Ekonomik Botëror në Davos se bota ndodhet përballë një zgjedhjeje vendimtare mes pranimit të “ligjit të më të fortit”, që sipas tij do të çonte në një qasje të re koloniale, dhe mbrojtjes së një multilateralizmi efektiv që garanton rendin global dhe shërben interesat e shteteve.
Në fjalimin e tij, Macron theksoi se ky është një moment kyç për mbrojtjen e sovranitetit dhe pavarësisë kombëtare. Ai u ndal edhe te vendimi i fundit për stacionimin e ushtrisë franceze në Groenlandë, duke e cilësuar atë si një hap për mbrojtjen e një territori strategjik dhe për mbështetjen e një aleati evropian, pa synuar të kërcënojë palë të tjera.
Presidenti francez vuri në dukje gjithashtu rolin e Grupit të Shtatë (G7), duke theksuar se Franca, përmes presidencës së saj, synon ta ringjallë këtë forum si një hapësirë për dialog të sinqertë dhe bashkëpunim, me qëllim parandalimin e luftërave tregtare, rritjes së proteksionizmit dhe cenimit të rendit ekonomik global.
“Objektivi ynë përmes G7 është të tregojmë se fuqitë kryesore të botës janë ende të afta të arrijnë një diagnozë të përbashkët të ekonomisë globale”, u shpreh Macron, duke bërë thirrje për një angazhim më të madh ndërkombëtar në përballimin e sfidave tregtare dhe gjeopolitike.
