Presidenti francez Emmanuel Macron deklaroi se sulmet amerikano-izraelite ndaj Iranit, të cilat nisën të shtunën dhe sipas raportimeve çuan edhe në vrasjen e liderit suprem të vendit, janë kryer “jashtë së drejtës ndërkombëtare”. Ai theksoi se Franca nuk mund t’i miratojë këto veprime.
Në një fjalim në televizionin kombëtar, Macron megjithatë e akuzoi Iranin për përshkallëzimin e tensioneve në Lindjen e Mesme. Qëndrimi i tij kritik ndaj sulmeve mund të krijojë tensione me Shtetet e Bashkuara.
Debati në Europë është ndezur edhe pas vendimit të kryeministrit spanjoll Pedro Sánchez për ta cilësuar luftën të paligjshme dhe për të ndaluar përdorimin e bazave spanjolle nga avionët amerikanë për operacione kundër Iranit. Ky vendim e shtyu presidentin amerikan Donald Trump të kërcënojë me ndërprerje të tregtisë me Spanjën.
Ndërsa kancelari gjerman Friedrich Merz nuk e mbrojti publikisht Sánchez gjatë një konference në Shtëpinë e Bardhë ku Trump bëri kërcënimin, Macron duket se po afrohet më shumë me qëndrimin e Spanjës për paligjshmërinë e luftës.
Presidenti francez paralajmëroi se konflikti mund të zgjasë dhe nuk ka një fund të dukshëm. Sipas tij, sulmet ndaj Iranit mund të vazhdojnë për të dobësuar kapacitetin e kundërsulmit të Teheranit, ndërsa Irani pritet të vazhdojë goditjet në rajon.
Për të mbrojtur interesat franceze në Lindjen e Mesme, Macron njoftoi dislokimin në Mesdhe të aeroplanmbajtëses Charles de Gaulle, së bashku me avionë luftarakë dhe sisteme të mbrojtjes ajrore.
Ai konfirmoi gjithashtu se Franca ka dërguar sisteme kundërraketë në Qipro dhe theksoi se Parisi duhet të respektojë angazhimet e mbrojtjes me aleatë si Katari, Kuvajti dhe Emiratet e Bashkuara Arabe, ku janë të vendosur rreth 800 ushtarë francezë.
Macron bëri të ditur gjithashtu se dronë iranianë goditën të dielën një bazë detare franceze në Emiratet e Bashkuara Arabe, pa shkaktuar të lënduar. Ndërkohë, avionët luftarakë francezë kanë kryer patrullime mbi Emiratet për të garantuar sigurinë e hapësirës ajrore.
