Konflikti në Lindjen e Mesme po merr përmasa gjithnjë e më të rrezikshme. Televizioni shtetëror iranian njoftoi se funeralet e liderit suprem të vrarë, Ali Khamenei, janë shtyrë për më vonë gjatë mbrëmjes së sotme, ndërsa vendi ndodhet nën sulme të vazhdueshme nga Izraeli dhe Shtetet e Bashkuara.
Në të njëjtën kohë, Irani ka emëruar si udhëheqës të ri suprem Mojtaba Khamenei, djalin e ajatollahut të vrarë, i cili pritet të marrë drejtimin e Republikës Islamike në mes të një përshkallëzimi të paprecedentë të luftës.
Tensionet janë zgjeruar edhe në rajon. Turqia bëri të ditur se një raketë e lëshuar nga Irani është interceptuar nga sistemi i mbrojtjes ajrore të NATO-s në hapësirën ajrore turke. Autoritetet turke paralajmëruan se Ankaraja “ka të drejtën të përgjigjet”.
Ndërkohë, raketa iraniane kanë goditur edhe Kuvajtin, ndërsa ushtria izraelite vazhdon sulmet në Teheran dhe ka ndërmarrë goditje edhe në Liban.
Në një tjetër zhvillim të rëndësishëm, një nëndetëse ka sulmuar një anije iraniane pranë brigjeve të Sri Lankës, duke shkaktuar 32 të plagosur.
Situata në rajon mbetet shumë e tensionuar, ndërsa frika për një përhapje më të gjerë të konfliktit në Lindjen e Mesme po rritet.
