Industria globale e aviacionit po përballet me një krizë të re, ndërsa lufta në Lindjen e Mesme dhe rritja e fortë e çmimit të karburantit po shkaktojnë anulime masive fluturimesh dhe rritje të ndjeshme të çmimeve të biletave.
Sipas të dhënave të analistëve të aviacionit nga Cirium, më shumë se 43 mijë fluturime janë anuluar në Lindjen e Mesme midis 28 shkurtit dhe 10 marsit, duke detyruar kompanitë ajrore të ndryshojnë itineraret dhe të shmangin zonat e konfliktit.
Ky kaos në trafikun ajror ka prishur ekuilibrin e rrjeteve të fluturimeve ndërkombëtare. Normalisht, kompani si Emirates, Qatar Airways dhe Etihad transportojnë rreth një të tretën e pasagjerëve mes Evropës dhe Azisë dhe më shumë se gjysmën e udhëtarëve mes Evropës dhe Australisë. Por lufta ka detyruar shumë fluturime të devijojnë nga këto korridore ajrore.
Paralelisht, industria po përballet me një tjetër goditje: rritjen e fortë të çmimit të karburantit për avionë (jet fuel). Sipas ekspertëve të sektorit, nëse çmimi i naftës rritet me 20%, karburanti për avionë mund të rritet disa herë më shumë për shkak të mungesës në treg.
Para sulmeve amerikane dhe izraelite ndaj Iranit, çmimi i jet fuel llogaritej rreth 85–90 dollarë për fuçi, ndërsa tani vlerësohet se mund të arrijë 150 deri në 200 dollarë.
Kjo situatë po detyron shumë kompani ajrore të rishikojnë tarifat. Air India, për shembull, ka njoftuar një shtesë në çmimin e biletave për fluturimet e brendshme dhe disa linja ndërkombëtare, ndërsa rritje edhe më të mëdha priten për fluturimet drejt Evropës, Amerikës së Veriut dhe Australisë.
Ndikimi në treg tashmë është i dukshëm. Çmimi i një bilete biznesi nga Milano në Sidnej mund të arrijë deri në rreth 17 mijë euro, ndërsa disa itinerare që shmangin zonën e Gjirit Persik kanë arritur deri në 20 mijë paund.
Të dhënat nga Google Flights tregojnë gjithashtu rritje të menjëhershme në disa linja. Një fluturim nga Seuli në Londër u rrit nga rreth 564 dollarë në mbi 4.300 dollarë brenda vetëm një jave.
Ekspertët paralajmërojnë se nëse çmimet vazhdojnë të rriten, kërkesa për udhëtime mund të bjerë ndjeshëm, pasi shumë udhëtarë privatë dhe kompani do të kufizojnë udhëtimet për shkak të kostove të larta dhe pasigurisë ekonomike.
