Shtetet e Bashkuara dhe Izraeli vazhduan të dielën bombardimet ndaj objektivave ushtarake iraniane dhe infrastrukturës energjetike, ndërsa lufta mes palëve po përshkallëzohet dhe nuk ka shenja për një ndalim të shpejtë të saj.
Në të njëjtën kohë, Pentagoni njoftoi se një ushtar i shtatë amerikan ka ndërruar jetë, pasi ishte plagosur rëndë gjatë një sulmi iranian ndaj një baze ushtarake në Arabinë Saudite ku ishin të stacionuara trupa amerikane.
Ushtari ishte plagosur më 1 mars dhe ndërroi jetë gjatë përgatitjeve për t’u transferuar për trajtim më të avancuar në një spital ushtarak amerikan në Gjermani.
Ndërkohë, Irani ka njoftuar se klerikët më të lartë janë pranë përfundimit të procesit për zgjedhjen e udhëheqësit të ri suprem, pas vrasjes së Ajatollah Ali Khameneit në sulmet e para të luftës SHBA-Izrael kundër Iranit. Sipas burimeve të mëparshme, favorit për këtë post konsiderohet Mojtaba Khamenei, djali i liderit të vrarë.
Gjatë fundjavës, sulmet goditën edhe objekte civile, përfshirë impiantet e desalinizimit të ujit në Iran dhe në Bahrein, duke rrezikuar furnizimin me ujë të pijshëm për miliona njerëz në rajon.
Irani u kundërpërgjigj duke lëshuar raketa dhe dronë drejt Izraelit dhe vendeve të Gjirit Persik, disa prej të cilave goditën infrastrukturë kritike civile.
Sipas autoriteteve iraniane dhe burimeve ndërkombëtare, numri i viktimave në Iran mbetet i paqartë, por mund të ketë kaluar 1,300 të vdekur, ndërsa lufta që shpërtheu më 28 shkurt vazhdon të përshkallëzohet në të gjithë Lindjen e Mesme.
