Banorët e Gazës po nxitojnë sërish drejt tregjeve për të blerë çfarëdo ushqimi që mund të përballojnë, ndërsa lufta rajonale që përfshin Shtetet e Bashkuara, Izraelin dhe Iranin po shkakton tronditje të reja në një territor që prej kohësh varet nga ndihmat humanitare dhe nga rrugë shumë të brishta furnizimi.
Sipas banorëve dhe tregtarëve lokalë, çmimet janë rritur ndjeshëm brenda pak ditësh, ndërsa disa produkte bazë janë bërë të rralla ose kanë zhdukur fare nga tregu.
Gazetari i Al Jazeera në Gaza City, Hani Mahmoud, raportoi se përshkallëzimi i fundit i konfliktit po ndihet menjëherë nga popullsia përmes mungesës së furnizimeve dhe kufizimeve në pikat kufitare.
Në tregjet lokale, shumë njerëz po përpiqen të sigurojnë ushqime para se rezervat të pakësohen edhe më shumë, nga frika se ajo që gjendet sot në treg mund të mos jetë më nesër.
Kjo pasiguri lidhet me varësinë e Gazës nga pikat kufitare me Izraelin dhe Egjiptin. Pothuajse të gjitha ushqimet, karburanti, ilaçet dhe mallrat bazë hyjnë në territor me kamionë. Kur këto pika kufitare mbyllen ose funksionojnë me kapacitet të reduktuar, pasojat ndihen shpejt në tregje, spitale dhe sistemin e ujit.
Izraeli mbylli kalimet kufitare të Gazës më 28 shkurt, në momentin kur forcat izraelite dhe amerikane nisën sulmet ndaj Iranit, duke ndërprerë hyrjen e ndihmave humanitare dhe evakuimin e pacientëve që kanë nevojë për trajtim jashtë territorit.
Më vonë u rihap për hyrje të kufizuar ndihmash kalimi Karem Abu Salem (Kerem Shalom), por qasja mbetet shumë e kufizuar. Ndërkohë kalimi Rafah me Egjiptin vazhdon të jetë i mbyllur, ndërsa organizatat humanitare paralajmërojnë se sasia e ndihmave që hyn aktualisht është shumë më e ulët nga sa kërkohet.
Drejtoresha rajonale e Organizatës Botërore të Shëndetësisë (OBSH) për Mesdheun Lindor, Hanan Balkhy, deklaroi se aktualisht në Gaza hyjnë rreth 200 kamionë ndihma në ditë, ndërkohë që për të mbuluar nevojat e popullsisë nevojiten rreth 600 kamionë çdo ditë.
Ajo shtoi se rreth 18 mijë persona, përfshirë fëmijë të plagosur dhe pacientë me sëmundje kronike, janë ende në pritje për t’u evakuuar për trajtim mjekësor jashtë Gazës.
Ndërkohë, në tregje po shihet qartë rritja e çmimeve. Një kilogram domate, që një muaj më parë kushtonte rreth 1.5 dollarë, tani po shitet gati 4 dollarë. Edhe kastravecat dhe patatet janë shtrenjtuar ndjeshëm, duke e bërë ushqimin e freskët të papërballueshëm për shumë familje.
