Platformat e mediave sociale që përdorin lëvizje të pafundme, riprodhim automatik dhe përmbajtje të drejtuar nga algoritme do të jenë të detyruara të shfaqin paralajmërime për dëmet e mundshme që mund t’i shkaktojnë shëndetit mendor të të rinjve, sipas një ligji të ri në shtetin e Nju Jorkut. Lajmin e bëri të ditur të premten guvernatorja Kathy Hochul.
“Siguria e njujorkezëve ka qenë prioriteti im kryesor që nga marrja e detyrës, dhe kjo përfshin mbrojtjen e fëmijëve tanë nga veçoritë e mediave sociale që nxisin përdorim të tepruar,” deklaroi Hochul.
Ligji përfshin platformat që ofrojnë të ashtuquajturat “rrjedha varësuese”, riprodhim automatik ose lëvizje të pafundme të përmbajtjes. Ai zbatohet për veprimtari që ndodhin pjesërisht ose plotësisht brenda shtetit të Nju Jorkut, por jo për përdoruesit që ndodhen fizikisht jashtë tij.
Sipas legjislacionit, prokurori i përgjithshëm i shtetit do të ketë të drejtën të ndërmarrë veprime ligjore dhe të kërkojë gjoba civile deri në 5,000 dollarë për çdo shkelje.
Guvernatorja Hochul i krahasoi këto paralajmërime me etiketat në produkte të tjera, si duhani, që paralajmëron për rrezikun e kancerit, apo ambalazhet plastike, që sinjalizojnë rrezikun e mbytjes për fëmijët e vegjël.
Këtë muaj, Australia vendosi ndalim të përdorimit të mediave sociale për fëmijët nën moshën 16 vjeç. Nju Jorku i bashkohet kështu shteteve si Kalifornia dhe Minesota, të cilat kanë miratuar ligje të ngjashme.
Ndërkohë, përfaqësues të kompanive TikTok, Snap, Meta dhe Alphabet nuk reaguan menjëherë ndaj kërkesave për koment.
Ndikimi i mediave sociale në shëndetin mendor të fëmijëve është kthyer në një shqetësim global në rritje. Në SHBA, disa distrikte shkollore kanë ngritur padi ndaj Meta Platforms dhe kompanive të tjera të teknologjisë.
Në vitin 2023, kirurgu i përgjithshëm i Shteteve të Bashkuara publikoi një këshillë zyrtare mbi masat mbrojtëse për fëmijët dhe më pas bëri thirrje për vendosjen e paralajmërimeve në mediat sociale — një masë që tashmë po zbatohet në Nju Jork./Reuters
