Qeveria e Libanit ka miratuar objektivat kryesorë të një plani të propozuar nga Shtetet e Bashkuara, që synon çarmatosjen e Hezbollahit deri më 31 dhjetor 2025 dhe tërheqjen graduale të trupave izraelite nga territori libanez. Këtë e bëri të ditur ministri libanez i Informacionit, Paul Morcos, pas mbledhjes së kabinetit, duke theksuar se plani nuk është diskutuar në detaje, por vetëm në parim.
Sipas burimeve politike, përfaqësuesit e Hezbollahit dhe aleatët shiitë braktisën mbledhjen në shenjë proteste ndaj këtij zhvillimi.
Plani amerikan, i paraqitur nga emisari i Uashingtonit për rajonin, Tom Barrack, parashikon katër faza që përfshijnë:
Dekret të menjëhershëm për çarmatosjen e Hezbollahit,
Shtrirjen e kontrollit të shtetit mbi të gjitha armët,
Tërheqjen izraelite nga pesë pozicione në jug të Libanit,
Zgjidhjen e çështjes së të burgosurve dhe
Caktimin përfundimtar të kufijve me Izraelin dhe Sirinë.
Faza përfundimtare e planit përfshin çmontimin e armëve të rënda të Hezbollahit, përfshirë raketat dhe dronët, si dhe organizimin e një konference ekonomike ndërkombëtare nga SHBA, Arabia Saudite, Franca, Katari dhe vende të tjera për të mbështetur rindërtimin dhe rimëkëmbjen ekonomike të Libanit.
Plani vjen në një moment tensioni në rritje mes Izraelit dhe Hezbollahit, si dhe shqetësimesh për rrezikun e një konflikti më të gjerë në rajon. Deri tani, as Izraeli dhe as Hezbollah nuk kanë dhënë komente zyrtare për këtë propozim amerikan.
