Alex Pretti, një infermier 37-vjeçar i kujdesit intensiv, u qëllua për vdekje nga agjentë federalë në Minneapolis në fillim të këtij muaji. Sipas Departamentit të Sigurisë Kombëtare (DHS), agjentët vepruan në vetëmbrojtje, duke pretenduar se Pretti kishte një pistoletë dhe i rezistoi përpjekjeve për t’u çarmatosur. Ky version është kundërshtuar nga familja e tij, disa dëshmitarë dhe zyrtarë lokalë.
Pretti punonte në spitalin e Çështjeve të Veteranëve në Minneapolis dhe, sipas familjes, ishte i shqetësuar nga politikat e administratës së presidentit amerikan Donald Trump, veçanërisht ato që lidhen me imigracionin dhe mjedisin. Familjarët kanë deklaruar se ai zotëronte ligjërisht një armë zjarri dhe kishte leje për mbajtje të fshehur në Minesota, por ata nuk besonin se ai e mbante armën me vete ditën e ngjarjes.
Familja e tij ka hedhur poshtë pretendimet që e etiketojnë Prettin si “terrorist vendas”, duke kërkuar zbardhjen e plotë të së vërtetës. Ata kanë theksuar se videot e publikuara tregojnë se ai nuk ishte i armatosur në momentin kur u ndalua nga agjentët federalë.
Alex Pretti ishte diplomuar në Universitetin e Minesotës dhe kishte punuar fillimisht si shkencëtar kërkimor, përpara se të kualifikohej si infermier. Ai njihej nga kolegët dhe fqinjët si një person i qetë, zemërmirë dhe i përkushtuar ndaj punës dhe aktiviteteve në natyrë. Vdekja e tij ka ngritur pikëpyetje serioze dhe ka nxitur thirrje për transparencë dhe hetim të plotë të ngjarjes.
