Në mesjetë aristokratët evropianë bënin bujë me poulaines, këpucë me maja aq të gjata sa dukeshin më shumë si deklaratë pushteti sesa si këpucë. Në Uashington duket se historia po përsëritet – por këtë herë me një stil pak më modern.
Fotografitë e sekretarit amerikan të Shtetit Marco Rubio dhe zëvendëspresidentit JD Vance kanë bërë xhiron e mediave: të dy shfaqen me këpucë të zeza elegante ku duket qartë një hapësirë e madhe mes këmbës dhe pjesës së pasme të këpucës. Me pak fjalë, këmbët duket sikur “notonin” brenda tyre.
Sipas Wall Street Journal, presidenti Donald Trump ka filluar t’u dhurojë zyrtarëve meshkuj rreth tij këpucë të markës Florsheim Oxford – një dhuratë presidenciale që duket se nuk është gjithmonë në përmasën e duhur.
Ekspertët e modës për meshkuj nuk kanë kursyer ironinë. “Janë qartësisht shumë të mëdha,” tha analisti i veshjeve Josh Peskowitz.
Sipas rrëfimit të Vance, ai dhe Rubio i kanë dhënë presidentit madhësitë e tyre të këpucëve: 13 dhe 11.5 sipas sistemit amerikan (rreth 48 dhe 45.5 në masat europiane). Trump, gjithmonë i gatshëm për një koment, thuhet se ka thënë:
“Për një burrë mund të kuptosh shumë nga madhësia e këpucëve.”
Por ekspertët e këpucëve thonë se nga madhësia e deklaruar nuk mund të kuptosh një gjë shumë të rëndësishme: nëse këpuca të rri mirë në këmbë.
Në këtë rast, sipas analistëve të modës, problemi nuk është filozofik – është thjesht praktik. Siç e përmblodhi një krijues i njohur i përmbajtjes për stilin mashkullor:
“Mos ia vini fajin markës. Kjo duket thjesht si një gabim përdorimi.”
Në fund, mes gjithë debateve për luftëra, diplomaci dhe strategji globale, Uashingtoni ka gjetur një temë të re diskutimi: sa të mëdha duhet të jenë këpucët e pushtetit. ????
