Ushtria izraelite shkatërroi plotësisht të hënën kullën Al-Ghafri, një ndërtesë 20-katëshe në pjesën perëndimore të Gazës, e cila ishte ndër ndërtesat më të larta në zonë. Para sulmit, banorët u njoftuan dhe u kërkua që ta braktisin ndërtesën brenda disa minutash.
Video e mëposhtme tregon momentet kur familjet janë filmuar teksa hidhnin sendet e tyre nga dritaret në panik, ndërsa përpiqeshin të shpëtonin çfarë të mundnin, pasi Izraeli u kishte dhënë atyre "pak minuta për të ikur" nga Kulla Mahna në qytetin e Gazës, përpara se ajo të bombardohej dhe të shkatërrohej.
Kulla strehonte qindra familje palestineze, si dhe zyrat e disa mediave dhe bizneseve të ndryshme. Sulmi shkaktoi dëme edhe në shtëpi pranë, ndërsa re tymi i zi mbuloi zonën, duke shkaktuar panik dhe largimin me ngut të banorëve, sipas dëshmive të qytetarëve.
Lagjja përreth kullës është një nga më të populluara në qytetin e Gazës dhe aty janë strehuar dhjetëra mijëra persona të zhvendosur nga pjesët veriore dhe lindore të rajonit.
Ushtria izraelite kishte paralajmëruar për evakuimin e ndërtesës dhe kampingjeve pranë saj, duke bërë të ditur se zona do të goditet “shumë shpejt”. Sipas forcave izraelite, grupi militant Hamas përdorte objektin për infrastrukturë ushtarake, pretendim që organizata ka mohuar në mënyrë të përsëritur.
