Kryeministri i Kanadasë, Mark Carney, ka mohuar sot raportimet se ai i ka ndryshuar apo tërhequr deklaratat e bëra gjatë fjalimit të tij në Forumin Ekonomik Botëror në Davos, pas një telefonate me presidentin amerikan, Donald Trump.
Carney tha për median se qëndron plotësisht pas gjithçkaje që tha në Davos dhe se ua ka bërë këtë të qartë edhe vetë autoriteteve amerikane gjatë bisedës telefonike. “Për të qenë absolutisht i qartë, dhe ia thashë këtë presidentit, e kisha me të vërtetë atë që thashë në Davos,” deklaroi ai.
Komentet e tij vijnë pas pretendimeve të Sekretarit të Thesarit të Shteteve të Bashkuara, Scott Bessent, i cili në një intervistë tha se Carney kishte “tërhequr disa nga komentet” e tij gjatë telefonatës me Trump – një version që kryeministri kanadez ka mohuar fuqishëm.
Gjatë bisedës mes tyre, e cila u zhvillua të hënën, u diskutuan çështje të ndryshme përfshirë situatën në Ukrainë, Venezuelë, sigurinë në Arktik dhe marrëdhëniet tregtare ndërmjet vendeve, përfshirë rishikimin e marrëveshjes USMCA midis Kanadasë, SHBA-së dhe Meksikës.
Fjalimi i Carney në Davos kishte tërhequr vëmendje ndërkombëtare pasi ai kritikoi fuqitë e mëdha për ndikimin e tyre ekonomik dhe i bëri thirrje vendeve të mesme të veprojnë strategjikisht në një rend global në transformim.
