Kryeministri britanik, Keir Starmer, ka lëshuar një paralajmërim të fortë ndaj emigrantëve që hyjnë ilegalisht në Mbretërinë e Bashkuar përmes Kanalit Anglez, duke u zotuar se nuk do të tolerojë më hyrjet e paligjshme.
Në një postim në platformën “X” (ish-Twitter), Starmer theksoi se çdo person që tenton të hyjë në Britani në këtë mënyrë do të ndalohet dhe do të kthehet mbrapsht.
“Jam i qartë: Ne nuk do të shpërblejmë hyrjen e paligjshme. Nëse kaloni Kanalin në mënyrë të paligjshme, do të ndaloheni dhe do të ktheheni mbrapsht,” shkroi ai.
Kjo deklaratë vjen në një moment kritik, teksa numri i emigrantëve që kalojnë Kanalin me gomone ka shënuar nivele rekord. Presioni publik dhe politik ndaj qeverisë për të ndaluar përdorimin e hoteleve si strehë për azilkërkuesit po rritet gjithashtu.
Sipas raportimeve të Sky News, protesta të vogla janë shfaqur jashtë disa hoteleve në zona të ndryshme të vendit, si shenjë pakënaqësie ndaj strehimit të emigrantëve në këto struktura.
Starmer ka theksuar se qeveria e tij është e vendosur t’i japë fund kësaj praktike dhe të ndalojë përdorimin e rrugëve ilegale për të hyrë në Britani, duke premtuar masa të ashpra për të frenuar fluksin e emigrantëve të parregullt.
