Kryebashkiaku i Nju Jorkut, Zohran Mamdani, deklaroi se është informuar këtë mëngjes për operacionin ushtarak të Shteteve të Bashkuara që çoi në kapjen e presidentit të Venezuelës, Nicolas Maduro, dhe bashkëshortes së tij, si edhe për transferimin e tyre në paraburgim federal në qytetin e Nju Jorkut.
Në reagimin e tij publik, Mamdani e cilësoi sulmin e njëanshëm ndaj një shteti sovran si një “akt lufte” dhe shkelje të ligjit federal dhe të së drejtës ndërkombëtare. Sipas tij, bëhet fjalë për një përpjekje të hapur për ndryshim regjimi, me pasoja që shkojnë përtej kufijve të Venezuelës.
Kryebashkiaku theksoi se këto zhvillime ndikojnë drejtpërdrejt edhe te qytetarët e Nju Jorkut, përfshirë dhjetëra mijëra venezuelianë që jetojnë në qytet. Ai nënvizoi se prioriteti i administratës së tij është garantimi i sigurisë së tyre dhe i çdo njujorkezi, duke shtuar se bashkia do të vijojë të monitorojë situatën dhe të japë udhëzime të përshtatshme sipas zhvillimeve.
