Britania e Madhe duhet të ribashkohet me Bashkimin Evropian, thotë kryebashkiaku i Londrës Sadiq Khan. Ai iu bashkua thirrjeve se Britania duhet të heqë dorë nga Brexit dhe të rindërtojë plotësisht lidhjet me bllokun evropian.
“Unë e shoh çdo ditë dëmin që Brexit i ka shkaktuar jo vetëm Londrës, por edhe londinezëve, dëmin ekonomik, shoqëror dhe kulturor. Jam mjaft i qartë për sa i përket asaj që duhet të ndodhë, që është se ne duhet të anëtarësohemi në Bashkimin Evropian.”, tha ai në një intervistë për gazetën italiane La Repubblica.
Ai propozoi një kthim me pesë hapa në bllokun evropian, me një rivendosje të marrëdhënieve me Brukselin të arritur tashmë nga qeveria e Keir Starmer, pastaj një afrim më të ngushtë, i ndjekur nga ribashkimi me Bashkimin Doganor, pastaj Tregun e Përbashkët, të dyja në këtë Parlament.
“Atëherë ne, si Parti Laburiste, duhet të garojmë në zgjedhjet e ardhshme të përgjithshme me një angazhim të qartë manifesti, një votë për Laburistët do të thotë se ne do të ribashkohemi me Bashkimin Evropian”, shtoi ai.
Kryebashkiaku londinez theksoi se dëmi ekonomik nga Brexit ishte “i jashtëzakonshëm”, ndërsa shtoi se një hulumtim të ri nga Instituti Kombëtar për Kërkime Ekonomike dhe Sociale dhe Goldman Sachs konfirmoi se ekonomia e Mbretërisë së Bashkuar do të ishte rritur me 10 përqind shtesë nëse nuk do të ishte jashtë BE.
Kryetari i bashkisë së Londrës argumentoi se ribashkimi me BE-në do të jepte nxitjen e vetme “më të madhe” për përballimin e krizës së kostos së jetesës në Mbretërinë e Bashkuar.
