Udhëheqësi i Koresë së Veriut, Kim Jong Un, mbikëqyri një paradë të madhe ushtarake ku u ekspozua raketa e re ndërkontinentale balistike, në prani të disa personaliteteve ndërkombëtare, raportoi të shtunën agjencia shtetërore KCNA.
Parada, e cila nisi vonë të premten, shënoi 80-vjetorin e themelimit të Partisë së Punës që drejton vendin dhe pasoi festimet e së enjtes.
Kryeministri kinez Li Qiang, ish-presidenti rus Dmitry Medvedev, si dhe kreu i Partisë Komuniste të Vietnamit, To Lam, u panë në krah të Kim-it gjatë paradës, ndërsa përfaqësues të tjerë të huaj e ndoqën nga tribuna.
Në paradën ushtarake, Koreja e Veriut e armatosur me armë bërthamore prezantoi raketën e saj më të avancuar ndërkontinentale balistike Hwasong-20, të cilën KCNA e përshkroi si “sistemi më i fuqishëm strategjik bërthamor i vendit”.
Seria Hwasong e raketave ICBM i ka dhënë Koresë së Veriut kapacitetin për të goditur çdo pjesë të territorit amerikan, por ende ekzistojnë dyshime rreth sofistikimit të sistemit të drejtimit dhe aftësisë së kokës bërthamore për të përballuar rikthimin në atmosferë.
“Hwasong-20 përfaqëson, për momentin, kulmin e ambicieve të Koresë së Veriut për kapacitete të dorëzimit të armëve bërthamore në distanca të gjata. Duhet të presim një testim të këtij sistemi para fundit të këtij viti,” tha Ankit Panda nga Carnegie Endowment for International Peace me seli në SHBA.
“Sistemi është ndoshta i projektuar për të mbajtur disa koka lufte... Kokat e shumta do të rrisin presionin mbi sistemet ekzistuese të mbrojtjes raketore të SHBA-së dhe do të shtojnë atë që Kim e sheh si të nevojshme për të arritur një efekt real parandalues ndaj Uashingtonit.”
Armë të tjera të ekspozuara në paradë përfshinin raketa balistike hipersonike, raketa lundruese, një lloj të ri lëshuesi raketash të shumëfishta dhe një sistem për lëshimin e dronëve vetëvrasës, tha Hong Min, analist i Koresë së Veriut në Institutin Korean për Unifikim Kombëtar.
Gjatë paradës, Kim mbajti një fjalim ku shprehu “inkurajim të ngrohtë” për trupat koreano-veriore në operacione jashtë vendit, duke shtuar se heroizmi i ushtrisë së vendit nuk do të shfaqet vetëm në mbrojtjen e Koresë së Veriut, por edhe në “pikat e përparme të ndërtimit socialist,” raportoi KCNA.
“Ushtria jonë duhet të vazhdojë të rritet dhe të shndërrohet në një forcë të pathyeshme që shkatërron çdo kërcënim,” tha Kim.
Kim zhvilloi më herët të premten bisedime me Medvedevin, i cili deklaroi se sakrifica e ushtarëve koreano-veriorë që luftojnë për Rusinë në fushatën e saj ushtarake në Ukrainë është dëshmi e besimit në marrëdhëniet mes dy vendeve.
Sipas KCNA, Kim i tha Medvedevit se shpreson të vazhdojë forcimin e bashkëpunimit me Rusinë dhe të angazhohet ngushtë në shkëmbime të ndryshme për të arritur qëllime të përbashkëta./Reuters
