Ligjvënësit amerikanë kanë publikuar 23 mijë faqe dokumente nga pasuria e financierit të dënuar për abuzim seksual, Jeffrey Epstein, duke sjellë sërish në qendër të vëmendjes lidhjet e tij me figura të njohura, përfshirë presidentin Donald Trump.
Demokratët në Komisionin e Mbikëqyrjes së Dhomës së Përfaqësuesve publikuan fillimisht tre shkëmbime emailesh, përpara se republikanët të bënin publike një sasi shumë më të madhe materialesh. Një nga email-et e publikuara, i datës prill 2011, është dërguar nga Epstein drejt bashkëpunëtores së tij, Ghislaine Maxwell, ku ai shkruan: “Dua që të kuptosh se qeni që s’ka lehur është Trump… [viktima] kaloi orë të tëra në shtëpinë time me të.”
Shtëpia e Bardhë ka reaguar menjëherë, duke thënë se “viktima” e përmendur në mesazh është e ndjera Virginia Giuffre, e cila sipas tyre ka deklaruar në mënyrë të përsëritur se Donald Trump “nuk ka qenë i përfshirë në asnjë shkelje”. Sekretarja për shtyp, Karoline Leavitt, i quajti akuzat “një mashtrim të fabrikuar nga demokratët për të krijuar një skandal të rremë”, ndërsa përfaqësuesit demokratë pohuan se dokumentet “godasin mbulesën e Shtëpisë së Bardhë mbi çështjen Epstein”.
Në një reagim në rrjetin e tij “Truth Social”, Trump akuzoi demokratët se “po përpiqen të ringjallin mashtrimin Epstein për të shmangur vëmendjen nga dështimi i tyre në menaxhimin e mbylljes së qeverisë”. Ai shtoi:
“Vetëm një republikan shumë i keq ose budalla do të binte në këtë kurth. Demokratët i kanë kushtuar vendit tonë 1.5 trilionë dollarë me sjelljen e tyre të fundit të rrezikshme. Nuk duhet të ketë asnjë devijim nga fokusi për të rihapur vendin dhe për të riparuar dëmet që ata kanë shkaktuar.”
Gjatë konferencës për shtyp në Shtëpinë e Bardhë, Leavitt tha se dokumentet “tregojnë qartë se presidenti Trump nuk ka bërë asgjë të gabuar”, duke kujtuar se ai “e ka përjashtuar Epsteinin nga klubi Mar-a-Lago sapo ka mësuar se ai ishte një pedofil dhe një njeri i neveritshëm”.
Në një moment gjatë konferencës, një gazetar pyeti nëse Trump mendon se Andrew Mountbatten-Windsor (ish-princi Andrew) duhet të dëshmojë para Kongresit për lidhjet e tij me Epstein. Leavitt tha se “nuk e ka diskutuar ende këtë çështje me presidentin”, ndërsa e la sallën duke injoruar pyetjet e mëtejshme për skandalin.
Epstein, i cili vdiq në vitin 2019 në një qeli burgu në Nju Jork, ishte dënuar më parë për abuzim seksual me të mitura. Publikimi i ri i dokumenteve ka ndezur debate të reja mbi mënyrën se si rrjeti i tij i lidhjeve me politikanë, biznesmenë dhe figura të njohura vijon të hedhë hije mbi jetën publike amerikane.
