Komiteti i Forcave të Armatosura i Dhomës së Përfaqësuesve në SHBA po përgatit një seancë informuese për javën e ardhshme lidhur me operacionin ushtarak në shkallë të gjerë të administratës Trump në Venezuelë. Një zyrtar i komitetit i tha CNN se kryetari republikan i këtij paneli, deputeti Mike Rogers, ka zhvilluar tashmë një bisedë me Sekretarin e Mbrojtjes, Pete Hegseth.
Demokratët kryesorë kanë kërkuar një informim të menjëhershëm pas sulmit. Udhëheqësi i pakicës demokrate në Dhomën e Përfaqësuesve, Hakeem Jeffries, dhe ai i Senatit, Chuck Schumer, kritikuan administratën Trump për mungesë autorizimi nga Kongresi për përdorimin e forcës ushtarake.
“Administrata Trump nuk ka kërkuar autorizim nga Kongresi për përdorimin e forcës ushtarake dhe nuk e ka njoftuar siç duhet Kongresin për operacionin në Venezuelë,” deklaroi Jeffries. Ai shtoi se siguria dhe stabiliteti në rajon nuk mund të arrihen vetëm përmes forcës ushtarake, duke kujtuar përvojat e dhimbshme të SHBA-së në Irak dhe Afganistan. Sipas tij, mbeten shumë pyetje pa përgjigje dhe kërkoi prova që të “shpjegojnë dhe justifikojnë këtë përdorim të paautorizuar të forcës”.
Në një deklaratë të veçantë, senatori Chuck Schumer tha se administrata e kishte siguruar atë në tri raste se nuk po ndiqte ndryshim regjimi dhe as veprime ushtarake në Venezuelë. “Qartazi, ata nuk po tregohen të sinqertë me amerikanët,” shtoi Schumer.
Ndërkohë, Administrata Federale e Aviacionit (FAA) njoftoi ndalimin e fluturimeve civile amerikane në hapësirën ajrore mbi Porto Rikon dhe pjesë të Karaibeve, për shkak të rreziqeve të sigurisë të lidhura me aktivitetin ushtarak. Masa emergjente vlen për të gjitha lartësitë në Rajonin e Informacionit të Fluturimit të San Juan-it dhe përfshin linjat ajrore amerikane, operatorët komercialë dhe pilotët e certifikuar nga FAA.
Sipas njoftimit zyrtar, ndalimi hyri në fuqi në orën 01:00 të mëngjesit të së shtunës, më 3 janar, ditën kur forcat amerikane njoftuan kapjen e presidentit venezuelian Nicolas Maduro, dhe do të mbetet në fuqi deri në mesnatën e së dielës, më 4 janar. Fluturimet ushtarake dhe ato shtetërore amerikane përjashtohen nga ky ndalim dhe mund të operojnë vetëm me autorizim të posaçëm nga qeveria amerikane ose FAA.
