Udhëheqësi i Koresë së Veriut, Kim Jong Un, do të marrë pjesë javën e ardhshme në një paradë ushtarake në Pekin, ka njoftuar Ministria e Jashtme e Kinës – në atë që konsiderohet si takimi i tij i parë ndërkombëtar me liderë botërorë.
Parada e quajtur “Dita e Fitores” do të shënojë 80-vjetorin e luftës së Kinës kundër Japonisë dhe fundin e Luftës së Dytë Botërore. Presidenti rus Vladimir Putin do të jetë gjithashtu mes 26 krerëve të shteteve të pranishëm, vetëm pak ditë pasi presidenti amerikan Donald Trump deklaroi se dëshironte të takohej me Kim-in.
Kina pritet të shfaqë armët e saj më të reja, përfshirë qindra avionë, tanke dhe sisteme kundër dronëve – hera e parë që struktura e re e forcave të ushtrisë do të paraqitet plotësisht në një paradë. Parada e organizuar në mënyrë tejet të koreografuar do të zgjasë 70 minuta dhe do të zhvillohet në Sheshin Tiananmen, ku do të marshojnë dhjetëra mijëra trupa ushtarake, mes tyre edhe veteranë të luftës. Ajo do të drejtohet nga presidenti kinez Xi Jinping dhe do të vëzhgohet me vëmendje nga fuqitë perëndimore.
Pekini lavdëroi Korenë e Veriut për “miqësinë tradicionale” disa-dekadëshe, duke theksuar bashkëpunimin për “paqen dhe stabilitetin rajonal”. Pjesëmarrja e Kim-it shihet si një përmirësim krahasuar me vitin 2015, kur Pheniani dërgoi vetëm një zyrtar të lartë, Choe Ryong-hae.
Krahas Putinit dhe Xi-së, prania e Kim-it në qendër të Pekinit do të jetë një moment simbolik dhe një fitore diplomatike për Kinën. Ndërkohë Trump po përpiqet të arrijë një marrëveshje me Putinin për t’i dhënë fund luftës në Ukrainë dhe ka shpallur se dëshiron të takohet sërish me Kim-in.
Koha është gjithashtu domethënëse, pasi Shtëpia e Bardhë ka lënë të hapur mundësinë që Trump të vizitojë rajonin në fund të tetorit dhe të takohet me Xi-n. Kjo do t’i jepte liderit kinez avantazhin të hynte në çdo samit me SHBA-të i informuar nga Kim dhe Putin. Është vizita e parë e Kim-it në Pekin pas gjashtë vitesh – hera e fundit ishte në vitin 2019 për 70-vjetorin e marrëdhënieve diplomatike mes dy vendeve.
Ndërkohë, pjesa më e madhe e liderëve perëndimorë pritet të mungojnë, për shkak të mospajtimeve me Putinin mbi luftën në Ukrainë. Japonia ka bërë thirrje që të mos merret pjesë, duke e quajtur paradën me “ton anti-japonez”.
Një pikëpyetje mbetet për pjesëmarrjen e presidentit të Koresë së Jugut, Lee Jae Myung. Ai është ftuar, por nuk ka konfirmuar ende, ndërsa qeveria e tij po mendon të dërgojë një zyrtar më të ulët.
Lee, i zgjedhur në qershor, ka shprehur dëshirën të flasë me Kim-in dhe të vendosë marrëdhënie paqësore me Veriun, madje i ka kërkuar Trump-it ndërmjetësim. Por Pheniani e ka refuzuar, madje e ka quajtur atë “maniak konfrontues”.
Nëse Lee merr pjesë, ai do të afrohej fizikisht me Kim-in, por rrezikon një refuzim publik që do të ishte goditje politike. Po ashtu, shfaqja e tij pranë Putinit, Lukashenkos dhe presidentit iranian mund të krijojë imazh të papërshtatshëm për Seulin.
