Scott Adams, karikaturisti amerikan që krijoi dhe ilustroi stripin satirik të famshëm “Dilbert”, ka ndërruar jetë nga kanceri në moshën 68-vjeçare. Lajmi u bë i ditur nga ish-bashkëshortja e tij, Shelly Miles, gjatë një transmetimi live të podkastit të tij Real Coffee with Scott Adams.
“Dilbert”, i publikuar për herë të parë në vitin 1989, përshkruante jetën në një mjedis pune disfunksional dhe u botua në mbi 2.000 gazeta në 65 vende të botës. Personazhi u shndërrua gjithashtu në libra, një serial të animuar dhe një videolojë.
Në vitin 2023, stripi u hoq nga disa media të mëdha amerikane, përfshirë Washington Post, pas akuzave se Adams kishte bërë komente raciste. Ai i mohoi akuzat, duke deklaruar se komentet e tij ishin hiperbolike dhe të nxjerra jashtë kontekstit.
Adams ishte fitues i çmimit prestigjioz Reuben Award në vitin 1997 nga Shoqata Kombëtare e Karikaturistëve. Në vitet e fundit, ai shkroi disa libra motivues dhe zhvillimi personal.
Ai vuante nga kanceri i prostatës, i cili ishte përhapur në kocka, dhe po merrte kujdes paliativ në shtëpi. Në një mesazh të fundit për ndjekësit, Adams u shpreh se kishte jetuar një jetë të plotë dhe u kërkoi njerëzve “të jenë të dobishëm” dhe të vazhdojnë të bëjnë mirë.
Presidenti amerikan Donald Trump reagoi me një mesazh ngushëllimi, duke e cilësuar Adams si një figurë me ndikim të madh dhe një njeri që luftoi me guxim sëmundjen e tij.
