Kryeministri Mark Carney ka deklaruar se Kanadaja planifikon të njohë shtetin palestinez në shtator, duke u bërë vendi i tretë nga G7 që njofton një vendim të tillë në ditët e fundit.
Carney tha se ky hap do të varet nga reforma demokratike, përfshirë mbajtjen e zgjedhjeve nga Autoriteti Palestinez vitin e ardhshëm, pa përfshirjen e Hamasit.
Deklarata e tij vjen një ditë pasi Britania njoftoi se do të njohë shtetin palestinez në shtator, përveç rasteve kur Izraeli pranon një armëpushim dhe kushte të tjera. Një javë më parë, Franca kishte bërë një njoftim të ngjashëm.
Ministria e Jashtme e Izraelit e hodhi poshtë njoftimin e Kanadasë, duke e cilësuar si “një shpërblim për Hamasin”. Aktualisht, 147 nga 193 vendet anëtare të OKB-së e njohin zyrtarisht shtetin palestinez.
Carney tha se Kanadaja do ta njohë zyrtarisht shtetin e Palestinës në Asamblenë e Përgjithshme të OKB-së që do të mbahet së shpejti.
Ai përmendi zgjerimin e vendbanimeve izraelite në Bregun Perëndimor të pushtuar, përkeqësimin e situatës humanitare në Gaza dhe sulmet e 7 tetorit 2023 ndaj Izraelit nga Hamasi, si arsyet kryesore që qëndrojnë pas këtij ndryshimi dramatik në politikën e jashtme të Kanadasë.
“Niveli i vuajtjeve njerëzore në Gaza është i padurueshëm dhe po përkeqësohet me shpejtësi,” tha Carney për gazetarët të mërkurën.
Ai shtoi se njohja e shtetit palestinez do të kushtëzohet me angazhimet e Autoritetit Palestinez për të reformuar thellësisht qeverisjen dhe për të çmilitarizuar territorin.Kanadaja ka qenë prej kohësh mbështetëse e zgjidhjes me dy shtete si pjesë e një procesi paqeje të negociuar, tha Carney, por shtoi se “ky qasje nuk është më e zbatueshme”.
“Perspektiva për një shtet palestinez po gërryhet para syve tanë,” u shpreh ai.
Carney njoftoi gjithashtu se kishte biseduar me presidentin e Autoritetit Palestinez, Mahmoud Abbas, më herët gjatë së mërkurës në lidhje me këtë vendim.
